दापोली कृषी विद्यापीठातर्फे बांधावर बियाणे वाटप

रत्नागिरी ः दापोली कृषी विद्यापीठाच्या विस्तार शिक्षण विभागातर्फे खरीप हंगामासाठी विविध उपक्रम राबविले जातात. दरवर्षीप्रमाणे महाविद्यालयाने घेतलेली दत्तक खेडी व त्या परिसरातील गावांमध्ये खरीप हंगामात भात, नागली व भाजीपाला बियाणे वाटप करण्यात आले.

या विभागामार्फत खरीप हंगामात प्रात्यक्षिकांकरिता विद्यापीठाने विकसित केलेल्या भाताच्या ट्रॉम्बे कर्जत कोलम, कर्जत-१०, कर्जत-८, रत्नागिरी-८, रत्नागिरी-६ नाचणीच्या दापोली-२ आणि दापोली सफेद -१ तसेच भाजीपाला बियाण्यांमध्ये कोकण कारली, पडवळ (कोकण श्‍वेता), कोकण घोसाळी, दोडकी (कोकण हरीता), भेंडी (वर्षा उपहार) आणि कोकण वाली या बियाण्यांचे दापोली तालुक्‍यातील सडवे, साखळोली, वाकवली, इनामपांगारी, जालगांव व खेड तालुक्‍यातील उधळे, कळंबणी व मंडणगड तालुक्‍यातील दहागाव येथील

शेतकऱ्यांच्या बांधावर जाऊन वाटप करण्यात आले. ग्राम बीजोत्पादन कार्यक्रमाअंतर्गत ट्रॉंम्बे कर्जत कोलम, कर्जत-२ हे भात बियाणे, दापोली-२ व नागली बियाणे दहागांव (मंडणगड), वाकवली, असोंड, उंबर्ले, ओळंगाव, इनामपांगारी (ता. दापोली) या गावातील निवडक शेतकऱ्यांच्या बांधावर सामाजिक अंतर ठेवून वाटप करण्यात आले.

यावेळी विभागाचे वरिष्ठ संशोधन सहायक प्रवीण झगडे यांनी उपस्थित शेतकऱ्यांना खरीप हंगामातील वाटप करण्यात आलेल्या बियाण्याची माहिती सांगितली. सध्या कोरोना विषाणूच्या प्रादुर्भावाबाबत शेतात काम करताना कोणती काळजी घ्यावी, याबाबत मार्गदर्शन केले. हा कार्यक्रम विस्तार शिक्षण विभागाचे प्रमुख डॉ. प्रमोद सावंत यांच्या मार्गदर्शनाखाली झाला.