‘शेतकरी सन्मान’साठी ९१.३३ टक्के खात्यांची माहिती अपलोड

अकोला  ः पंतप्रधान शेतकरी सन्मान निधी (पीएम किसान) योजनेचे निकष केंद्र शासनाने शिथिल केल्याने लाभार्थी संख्या वाढत आहे. राज्यात शुक्रवारपर्यंत (ता. १२) ८६ लाख ३४ हजार ४४६ खात्यांची माहिती अपलोड झाली आहे. आता केवळ आठ लाख ४१ हजार ७४१ खात्यांची माहिती भरण्याचे काम शिल्लक राहिले आहे. राज्यातील शेतकऱ्यांच्या याद्या अपलोड करण्याचे काम ९१.३३ टक्के पूर्ण झाले आहे.

केंद्र सरकारने जाहीर केलेल्या योजनेनुसार आता शेतकरी कुटुंबांसाठी दोन हेक्टरची मर्यादा रद्द करण्यात आली आहे. सरसकट शेतकरी कुटुंबे योजनेसाठी पात्र मानली जात आहेत. राज्यातील सुमारे ९४ लाख ५४ हजार शेतकरी कुटुंब या योजनेसाठी पात्र ठरण्याची शक्यता आहे. आतापर्यंत दोन टप्प्यांत राज्यातील लाखो शेतकऱ्यांच्या खात्यात निधी जमा करण्यात आला आहे. क्षेत्र मर्यादेची अट काढून टाकण्यात आल्याने पात्र लाभार्थी शेतकरी कुटुंबांच्या याद्या संकलित करण्याचे काम युद्धपातळीवर करण्यात आले. शासनाने निर्गमित केलेल्या मार्गदर्शक सूचनांनुसार पीएम किसान पोर्टलवर ही माहिती अपलोड केली जात आहे. 

मिळालेल्या माहितीनुसार राज्यातील शेतकऱ्यांच्या याद्या अपलोड करण्याचे काम ९१.३३ टक्के पूर्ण झाले आहे. यामध्ये नागपूर विभागाने ९ लाख ३७१ शेतकऱ्यांच्या याद्या अपलोड करीत ९२.७० टक्के काम पूर्ण केले. कोकण विभागाने ५ लाख ४९ हजार १३७ शेतकऱ्यांची माहिती अपलोड करीत ८५.६८ टक्के असे सर्वांत कमी काम केले आहे. देशातील शेतकऱ्यांना उत्पन्न मिळण्यासाठी केंद्राने ही योजना सुरू केली आहे.

योजनेअंतर्गत शेतकरी कुटुंबाला सहा हजारांचे आर्थिक सहकार्य तीन टप्प्यांमध्ये देण्यात येणार आहे. योजना राबविण्यासाठी कृषी विभागाने राज्यात चार फेब्रुवारीला एक परिपत्रक काढले असून, यंत्रणांना त्यासाठी निर्देश दिले आहेत.