डेअरी उद्योगाकडून पूरग्रस्तांना मदत

पुणे : कोट्यवधीचे अनुदान अडकल्यामुळे अडचणीत असलेल्या राज्याच्या दूध उद्योगाने संकटातही सामाजिक बांधीलकी सोडली नाही. पूरग्रस्तांसाठी तब्बल दीड कोटी रुपयांचा निधी डेअरी उद्योगाने दिला आहे.   राज्याच्या एका भागात चारापाणी टंचाई, तर दुसऱ्या भागाला पुराचा झटका बसलेला आहे. त्यात पुन्हा दुधाचे २५० कोटींचे अनुदान राज्य शासनाकडे अडकून पडले आहे. अशा स्थितीतदेखील पूरग्रस्तांसाठी मदत करण्याचा निर्णय डेअरी उद्योगाने घेतला.  “आर्थिक अडचण असली तरी अजून त्रास सहन करावा; मात्र, मुख्यमंत्री निधीसाठी भरीव निधी गोळा झाला पाहिजे, असा निर्णय राज्यातील खासगी व सहकारी डेअरी संघांनी घेतला होता. त्यानुसार एक कोटी रुपयांचा निधी जमा झाला,” अशी माहिती सूत्रांनी दिली.  दूध उत्पादक व प्रक्रिया व्यावसायिक कल्याणकारी संघाचे खजिनदार डॉ. विवेक क्षीरसागर म्हणाले की, “राज्यातील सर्व डेअरी युनिटच्या वतीने मुख्यमंत्री देवेंद्र फडणवीस यांच्याकडे एक कोटीचा निधी सुपूर्त करण्यात आला. या निधीचा वापर सांगली, कोल्हापूर भागातील पूरग्रस्तांसाठी केला जाणार आहे.” संघाचे उपाध्यक्ष गोपाळराव म्हस्के, कात्रज संघाचे अध्यक्ष विष्णूकाका हिंगे, सोनई दूध उद्योग समुहाचे अध्यक्ष दशरथदादा माने तसेच ऊर्जा डेअरीचे प्रकाश कुतवळ, पराग डेअरीचे संजय मिश्रा, चितळे उद्योगचे श्रीपाद चितळे, कन्हैया दूधचे मच्छिंद्र लंके तसेच इतर पदाधिकारी या वेळी उपस्थित होते.  दरम्यान, चितळे डेअरी उद्योग समूहाने अजून एक पाऊल पुढे टाकून ५१ लाखांचा निधी पूरग्रस्तांसाठी दिला. संचालक श्रीपाद चितळे व संजय चितळे यांनी मुख्यमंत्र्यांकडे निधी दिला.  या निधीसाठी भिलवडी स्टेशनमधील बी. जी. चितळे उद्योगाकडून २६ लाख रुपये, तर पुण्यातील चितळे बंधू मिठाईवाले यांच्याकडून २५ लाख रुपये देण्यात आले.  चितळे डेअरी उद्योग समूहाचे संचालक श्रीपाद चितळे याबाबत म्हणाले की, “राज्यातील लाखो शेतकऱ्यांना दुधाच्या जोडधंद्याने सावरले आहे. महापुरामुळे सांगली व कोल्हापूर भागातील दूध उत्पादक शेतकरी उद्‌ध्वस्त झाले आहेत. या शेतकऱ्यांचे संसार पुन्हा उभे करावे लागतील. शासनाच्या प्रयत्नांना आपली देखील साथ असावी म्हणून आम्ही स्वतः पूरग्रस्त पशुपालकांचे व्यवसाय उभे करण्यासाठी स्वतंत्र अभियान हाती घेतले आहे. त्याअंतर्गत हजारो शेतकऱ्यांना दुभत्या जनावरांचे वाटप केले जात आहे.”