गोंदिया ः गेल्या हंगामात देण्यात आलेल्या कर्जाच्या परतफेडीकरिता ३१ मार्चपर्यंतची मुदत होती. परंतु कोरोना लॉकडाउनमुळे आर्थिक बाजू कमकुवत झाली असल्याने अनेक शेतकऱ्यांना हे शक्‍य झाले नाही. परिणामी, कर्ज परतफेडीची मुदत ३१ जूनपर्यंत वाढविण्यात यावी, अशी मागणी शेतकऱ्यांनी केली आहे. या मागणीचा विचार न झाल्यास तीव्र आंदोलनाचा इशाराही देण्यात आला आहे.
शेतकऱ्यांना खरीप हंगामात धानाची लागवड, बियाणे, खते यासाठी सेवा सहकारी संस्थेमार्फत तीन लाखांच्या मर्यादेत बिनव्याजी कर्ज उपलब्ध करून दिले जाते. तिरो तालुक्‍यात ६७ सेवा सहकारी सोसायटी आहेत. त्यांच्या माध्यमातून तालुक्‍यातील जवळपास ३५०० शेतकऱ्यांना २०२०-२१ या वर्षात कर्जवाटप करण्यात आले.
खरीप हंगामातील धानाची विक्री करुन ३१ मार्चपर्यंत कर्जाची परतफेड शेतकरी सेवा सोसायटीला करतात किंवा तसा नियम देखील आहे. या वर्षी मात्र धानावर कीड-रोगाचा प्रादुर्भाव झाला. त्यासोबतच खरीप हंगामातील धानाचा उतारा देखील कमी आला. त्यातच शेतकऱ्यांनी आधारभूत केंद्रावर धानाची विक्री केली. त्याचे चुकारे देखील अनेक शेतकऱ्यांच्या खात्यात अद्याप जमा झाले नाही.
त्यामुळे कर्जाची परतफेड करण्याचे आव्हान त्यांच्यासमोर आहे. शासनाने शेतकऱ्यांना दिलासा देण्यासाठी कर्ज परतफेडीची मुदत ३१ जूनपर्यंत वाढवावी, अशी मागणी त्या पार्श्‍वभूमीवर करण्यात आली आहे. अन्यथा, या विरोधात आंदोलन छेडण्याचा इशाराही शेतकऱ्यांसह जनमानस संघटनेने दिला आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.