गुजरातच्या सोईचे निर्णय घेतले जातात ः शरद पवार

यवतमाळ : गुजरातकडून येणाऱ्या सूचनांचेच पालन फडणवीस सरकारला करावयाचे असून केवळ विरोधकांना शिव्या, शाप देण्यातच त्यांचा वेळ जात असल्याची घणाघाती टीका राष्ट्रवादी काँग्रेसचे अध्यक्ष शरद पवार यांनी केला.

यवतमाळ येथे गुरुवारी (ता. १०) माजी आमदार संदीप बाजोरीया यांच्या जनसंपर्क कार्यालयात आयोजित पत्रकार परिषदेत बोलत ते होते. श्री. पवार म्हणाले, की राज्याची सूत्र विदर्भाच्या हातात आहेत, असे असतानाही येथील प्रश्‍न सुटलेले नाही. कारखानदारी बंद पडत आहे, बेरोजगारी वाढत असून विकास दर खालावत आहे. या प्रश्‍नांची सोडवणूक करण्याची कुवत सत्ताधाऱ्यांमध्ये नाही.

श्री. पवार दोन दिवसांपासून विदर्भ दौऱ्यावर आहेत. या वेळी आमदार ख्वाजा बेग, नानाभाऊ गाडबैले, जिल्हाध्यक्ष आशिष मानकर, वसंतराव घुईखेडकरी उपस्थित होते.

नितीन गडकरींच्या कामांची केली स्तुती नितीन गडकरी यांनी नागपूर आणि परिसरात केलेली कामेच केवळ दिसतात. इतर कुठलेही काम केंद्र किंवा राज्य शासनाने केलेले असे दिसत नाही. असे म्हणत शरद पवार यांनी केंद्रीय मंत्री नितीन गडकरी यांच्या कामांची स्तुती केली. मुख्यमंत्री तसेच अर्थमंत्री विदर्भातील आहे. दोन महत्त्वाची खाती विदर्भात असतानाही विदर्भातील रस्त्यांची स्थिती चिंताजनक आहे. यामुळे ‘खड्डेयुक्त रस्ता’ असे धोरण सरकारचे असावे, अशी शंका कुणाच्याही मनात आल्याशिवाय राहत नाही.