खत कंपन्यांनी किमती जाहीर कराव्यात : कृषी आयुक्तालय

पुणे: राज्यात खतांची खरेदी करताना शेतकऱ्यांची फसवणूक टाळण्यासाठी सर्व खत कंपन्यांनी आपआपल्या उत्पादनांच्या किमती प्रसार माध्यमांमधून जाहीर कराव्यात, अशा सूचना कृषी आयुक्तालयाने दिल्या आहेत. निविष्ठा व विस्तार संचालक विजयकुमार घावटे यांनी खत उत्पादक कंपन्यांना येत्या खरीप हंगामात किमतीविषयी दक्ष राहण्याबाबत सूचित केले आहे. गुणनियंत्रण निरीक्षकांनाही क्षेत्रीय पातळीवर तपासणी करताना भाव फलकावर लक्ष ठेवण्याच्या सूचना दिल्या जात आहेत. “शेतकऱ्यांनी खतांची खरेदी सुरू केली आहे. खतांची विक्री रास्त भावात होण्यासाठी तसेच फसवणूक टाळण्यासाठी खतांचे उत्पादन किंवा विक्री करणाऱ्या कंपनीने खतांच्या ग्रेडसहीत किमती जाहीर करायला हव्यात. वर्तमानपत्रांमधून या किमती जाहीर केल्यास शेतकरी वर्गात जागृती होईल. आम्ही तसे खत कंपन्यांना कळविले आहे, “अशी माहिती आयुक्तालयाच्या सूत्रांनी दिली. राज्यातील सर्व कृषी सेवा केंद्र चालकांनी देखील दर्शनी भागात खतांच्या किमतीचे फलक लावले पाहिजेत. त्यासाठी कंपन्यांनी किरकोळ व घाऊक खत विक्रेत्यांना सूचना द्याव्यात. विक्रेत्यांकडून कोणत्याही स्थितीत जादा दराने खतांची विक्री होणार नाही यासाठी कंपन्यांनी आपआपल्या यंत्रणांना काळजी घेण्याबाबत कळवावे, असेही आयुक्तालयाने या कंपन्यांना सांगितले आहे.

काळाबाजार करणाऱ्यांवर गुन्हे  दरम्यान, कृषी आयुक्त सुहास दिवसे यांनी राज्यात यंदा खत पुरवठा सुरळितपणे होत असल्याचे स्पष्ट केले होते. “कोरोना स्थितीमुळे खतांचा काळाबाजार किंवा जादा दराने विक्री झाल्याचे निदर्शनास आल्यास आम्ही विक्रेत्यांचे परवाने रद्द करू तसेच गुन्हे देखील दाखल करू,” असाही इशारा आयुक्तांनी यापूर्वीच दिला आहे.