ओल्या दुष्काळाची घोषणा करा

अकोला : विदर्भ, मराठवाड्यात मागील दोन दिवसांत संततधार पाऊस, अतिवृष्टी झाली. शेतकऱ्यांची काढणीला आलेली सोयाबीन, ज्वारी, कपाशीची पिके हातातून गेली आहेत. याआधीही हंगामात नुकसान झालेले आहे. त्यामुळे कुठलेही कारण न शोधता शासनाने तातडीने ओला दुष्काळ जाहीर करून शेतकऱ्यांना मदत करावी, अशी मागणी स्वाभिमानी शेतकरी संघटनेचे नेत रविकांत तुपकर यांनी शासनाकडे केली आहे. दुष्काळ जाहीर न केल्यास संघटना रस्त्यावर उतरेल, असा इशाराही त्यांनी या निमित्ताने दिला आहे.  या बाबत तुपकर यांनी म्हटले आहे, १६ आणि १७ ऑक्टोबरला अतिवृष्टी झाली. त्यामुळे विदर्भ, मराठवाड्यात शिल्लक असलेल्या पिकांचे अतोनात नुकसान झाले. शेतांमध्ये नद्या तयार झाल्या. शेतकरी ढसाढसा रडतो आहे. तरीही राज्यकर्ते त्याच्याकडे बघायला तयार नाहीत. या पूर्वीच्या नुकसानासाठी जी मदत राज्य सरकारने घोषित केली होती, ती तोकडी आहे. ती अजूनसुद्धा मिळालेली नाही. पहिलेही नुकसान झालेले आहे. आताही अतिवृष्टी झाली. राज्य असो की केंद्र, या दोन्ही सरकारांना पळ काढता येणार नाही. केंद्राने मोठे मन करावे. अतिवृष्टीग्रस्त शेतकऱ्यांना मोठी मदत करावी. राज्यातील मंत्र्यांना या जबाबदारीपासून पळ काढता येणार नाही. ताबडतोब ओला दुष्काळ जाहीर करून शेतकऱ्यांना कुठल्याही अटी, निकष न लावता भरीव मदत करा. तिजोरीत पैसा नाही या सबबीखाली तुम्हाला दूर जाता येणार नाही. ही सर्व जबाबदारी तुमची आहे. शेतकऱ्यांच्या आत्महत्या झाल्यानंतर मदत करणार आहात काय, असा प्रश्‍नही तुपकर यांनी विचारला आहे. केंद्र व राज्य सरकारने ओल्या दुष्काळाची घोषणा केली नाही तर स्वाभिमानी शेतकरी संघटना ताकदीने रस्त्यावर उतरेल. याचे जे काही परिणाम होतील त्यास सरकार जबाबदार असेल, असा इशाराही त्यांनी दिला.