खानदेशातील बाजारात उडदाच्या आवकेत घट

जळगाव : खानदेशातील प्रमुख बाजार समित्यांमध्ये उडदाची आवक नगण्यच आहे. दरही दबावात आहेत. अशा स्थितीत अनेक शेतकरी शासकीय  खरेदी योजनेत उडीद विक्रीसाठी नोंदणी करून घेत आहेत. 

अतिपावसाने खानदेशात उडदाची मोठी हानी झाली आहे. पिके हातची गेली आहेत. अतिपावसाने मळणीवर आलेल्या उडदाचे अनेक शेतकऱ्यांना मोठे नुकसान सहन करावे लागले. यात शेतकऱ्यांना मोठा फटका बसला आहे. या महिन्याच्या सुरवातीला ज्या शेतकऱ्यांचा उडीद मळणीवर आला. त्यातील काही शेतकऱ्यांनी मजूर, मळणीची यंत्रणा तातडीने राबवून जांगडा मळणी यंत्राद्वारे उडदाची मळणी करून घेतली. यात ओलावा असलेल्या उडदाची मळणीदेखील झाली. यामुळे काही शेतकऱ्यांचा उडीद बऱ्यापैकी दर्जेदार आहे. 

अनेक शेतकऱ्यांचा किंवा अधिक पेरणी क्षेत्र असलेल्या शेतकऱ्यांच्या उडदाचे मोठे नुकसान अतिपावसात झाले. कारण, मजूर, यंत्रणेच्या अभावात वेळेत मळणी, कापणी होऊ शकली नाही. जळगाव जिल्ह्यात सुमारे १२ हजार हेक्टरवरील उडदाचे ७५ टक्क्यांवर नुकसान झाले आहे. पेरणी सुमारे २१ हजार हेक्टर एवढी झाली होती.

धुळ्यातही सुमारे पाच हजार हेक्टर आणि नंदुरबारातही सुमारे सहा हजार हेक्टरवरील उडदाला अतिपावसाचा फटका बसला. बहुसंख्य शेतकऱ्यांच्या हाती उडदाचे पीक आलेले नाही. अशात ज्यांच्या घरात पीक आले आहे, त्यांनाही हवा तसा दर सध्या मिळत नसल्याचे चित्र आहे. 

शेतकऱ्यांकडून येणाऱ्या उडदासंबंधीचे व्यवहार जळगाव बाजार समितीत बंदावस्थेत आहेत. यातच शेतकऱ्यांच्या उडदाला १५०० ते ३२०० रुपये प्रतिक्विंटलचा दर अमळनेर, चोपडा, जळगाव, धुळ्यातील शिरपूर, नंदुरबारमधील शहादा या प्रमुख बाजार समित्यांमध्ये आहे. हमीभाव मिळत नाही. त्यातच खरेदीदारांनी मंदी, कोरोनाचे कारण सांगून दर पाडल्याने शेतकऱ्यांचे नुकसान होत आहे. 

जळगाव, धुळ्यात नोंदणी

बाजारात हमीभाव मिळत नसल्याने जळगाव, धुळे जिल्ह्यातील शेतकरी शासकीय खरेदी योजनेत निश्‍चित केंद्रात उडीद विक्रीसाठी नोंदणी करून घेत आहेत. या नोंदणीला गेल्या दोन दिवसांत प्रतिसाद मिळाला आहे.

जळगाव जिल्ह्यात सुमारे १५० शेतकऱ्यांनी नोंदणी केली आहे. तर, धुळ्यातही सुमारे १२५ शेतकऱ्यांनी नोंदणी केली आहे, अशी माहिती मिळाली. जळगाव जिल्ह्यात पाचोरा, अमळनेर व जळगाव येथे उडीद खरेदी होईल. तर धुळ्यात धुळे, शिंदखेडा व शिरपूर येथे खरेदी केंद्र सुरू होईल.