पुणे विभागात हरभरा पेरणी क्षेत्रात घट

पुणे ः बदलत्या हवामानामुळे अनेक शेतकऱ्यांनी उशिराने हरभऱ्याची पेरणी केली आहे. पुणे विभागात आत्तापर्यंत दोन लाख १७ हजार २२४ हेक्टरपैकी एक लाख ७८ हजार ४१० हेक्टर म्हणजेच ८२ टक्के पेरणी झाली आहे. अजूनही सुमारे ३८ हजार ८१० हेक्टर क्षेत्र पेरणीपासून दूर राहिले आहे. त्यातच किडी रोगाच्या प्रादुर्भावामुळे हरभऱ्याच्या उत्पादनात २० ते ३० टक्क्यांपर्यंत घट होण्याची शक्यता कृषी विभागाच्या सूत्रांनी वर्तविली आहे.

पुणे विभागातील शेतकऱ्यांनी मोठ्या प्रमाणात विजय, विशाल यासारख्या वाणाच्या हरभऱ्यांची पेरणी केली होती. यंदा हरभरा उत्पादक शेतकऱ्यांनी आर्थिक परिस्थिती नसताना पीककर्ज घेऊन रब्बीची तयारी केली होती. अनेकांनी खते, बियाणांची खरेदी वेळेवर केली होती. परंतु यंदा पुरेसा पाऊस झाला असला तरी वेळेवर वाफसा न झाल्याने अनेकांनी उशिराने पेरण्या केल्या. काही ठिकाणी सतत बदलत असलेल्या वातावरणामुळे अनेक शेतकऱ्यांनी पेरणी केली नाही. परिणामी, विभागात जवळपास ३८ हजार ८१० हेक्टर क्षेत्र पेरणीपासून वंचित राहिले आहे.

पाण्याची सुविधा असलेल्या शेतकऱ्यांनी हरभरा पिकांची पेरणी केली. परंतु, कोरडवाहू भागात पुरेसा पाऊस न झाल्यामुळे विहिरी कोरड्या पडू लागल्याने पिकांना पाणी देण्यास अडचणी तयार झाल्या आहेत. त्यामुळे पिकांच्या वाढीवर मोठा परिणाम झाला असून उत्पादनात मोठी घट होण्याची शक्यता आहे. याशिवाय पाणीटंचाईमुळे कोरडवाहू भागात पुरेशा प्रमाणात हरभऱ्याच्या पेरण्या होऊ शकल्या नाहीत. त्याचा परिणामही उत्पादनावर होणार असल्याचे कृषी विभागाच्या सूत्रांमधून बोलले जात आहे.