मराठवाड्यातील उपयुक्त पाण्यात घट

औरंगाबाद : मराठवाड्यातील ८४ लघू आणि ७ मध्यम प्रकल्प कोरडेठाक पडले आहेत. उन्हाच्या तीव्रतेबरोबर पाणीसाठेही झपाट्याने तळाच्या दिशेने जात आहे. ८७३ प्रकल्पांमधील उपयुक्‍त पाणीसाठा संकल्पीत पाणीसाठ्याच्या तुलनेत निम्म्यापेक्षाही कमी झाला आहे. 

मराठवाड्यातील ११ मोठ्या प्रकल्पांत ६० टक्‍के, ७५ मध्यम प्रकल्पांत ३३ टक्‍केच उपयुक्‍त पाणी शिल्लक आहे. सर्वाधिक संख्येने असलेल्या ७४९ लघू प्रकल्पांत केवळ २४ टक्‍केच उपयुक्‍त पाणीसाठा शिल्लक आहे. या लघू प्रकल्पांपैकी ८४ प्रकल्पांत पाण्याचा थेंब नाही. यामध्ये औरंगाबाद जिल्ह्यातील २५, जालना ११, बीड २६, लातूर १२, तर उस्मानाबाद जिल्ह्यातील दहा प्रकल्पांचा समावेश आहे. १६२ लघू प्रकल्पांतील पाणीसाठा जोत्याखाली आहे. त्यात औरंगाबाद जिल्ह्यातील ४, जालना १३, बीड २९, लातूर ४२, उस्मानाबाद ६३, नांदेड ४, परभणी ६ तर, हिंगोली जिल्ह्यातील एका लघू प्रकल्पाचा समावेश आहे. तब्बल १५९ लघू प्रकल्पांत २५ टक्‍क्‍यांपेक्षाही कमी उपयुक्‍त पाणी आहे. 

७५ मध्यम प्रकल्पांपैकी ७ प्रकल्प कोरडेठाक आहेत. यामध्ये औरंगाबाद जिल्ह्यातील २, बीडमधील ४ तर, लातूरमधील एका मध्यम प्रकल्पाचा समावेश आहे. तब्बल १३ मध्यम प्रकल्पातील पाणीसाठा जोत्याखाली आहे. 

लघू प्रकल्पांतील पाणीसाठा चिंताजनक 

मराठवाड्यातील ७४९ लघू प्रकल्पांपैकी तब्बल ४१० प्रकल्पांतील उपयुक्‍त पाणीसाठा २५ टक्‍क्‍यांपेक्षा जास्त नाही. जालना जिल्ह्यातील  ५७ व उस्मानाबाद जिल्ह्यातील २०५ लघू प्रकल्पांत केवळ १५ टक्‍केच उपयुक्‍त पाणीसाठा शिल्लक आहे. दुसरीकडे बीड जिल्ह्यातील १२६ व परभणी जिल्ह्यातील २२ लघू प्रकल्पात केवळ २५ टक्‍केच उपयुक्‍त पाणीसाठा शिल्लक असल्याची माहिती जलसंपदा विभागाच्या वतीने देण्यात आली.