परभणी : धरणांच्या जलाशयातील उणे पाणीसाठा घटतोय

परभणी ः वाढते तापमान, बेसुमार उपसा, वेगाच्या वाऱ्यामुळे वाढलेला बाष्पीभवनाचा वेग आदी कारणांनी मोठ्या, मध्यम प्रकल्पांच्या धरणांच्या जलाशयातील उणे उपयुक्त पाणीसाठ्यात मध्ये दिवसागणिक घट होत आहे. जलस्रोत झपाट्याने तळ गाठत आहेत. त्यामुळे पाणीटंचाईग्रस्त लोकवस्त्यांची संख्या वाढत चालली आहे.

पाणलोट क्षेत्रात कमी पाऊस झाल्यामुळे यंदा जायकवाडी, माजलगाव, येलदरी, सिद्धेश्वर, निम्न दुधना या मोठ्या प्रकल्पांसह मासोळी, करपरा या मध्यम प्रकल्पांमध्ये गतवर्षीपेक्षा खूप कमी उपयुक्त पाणीसाठा जमा झाला होता. त्यात नदीपात्रात तसेच कालव्याद्वारे पाणी सोडण्यात आल्यामुळे मोठ्या प्रकल्पांतील उपयुक्त पाणीसाठा लवकरच संपुष्टात आला. त्यामुळे या धरणामध्ये केवळ मृत पाणीसाठा शिल्लक राहिला होता. एप्रिल महिन्यापासून तापमानात मोठी वाढ झाली आहे. मे महिन्यात एकीकडे अनेक ठिकाणी ४२ ते ४६ अंश सेल्सिअसपर्यंत तापमानाचा पारा वर गेला आहे. तर दुसरीकडे जलाशयामधून पंपाद्वारे अवैधरीत्या बेसुमार पाणीउपसा सुरूच आहे. त्यामुळे उणे उपयुक्त पाणीसाठ्यातून मोठी घट सुरू आहे.

रविवारी (ता. २६) पैठण येथील जायकवाडी धरणांमध्ये -६.३९ टक्के, माजलगाव धरणात -२१.४६ टक्के, येलदरी धरणामध्ये -३.७३ टक्के, सिद्धेश्वर धरणामध्ये -४३.१३ टक्के, निम्न दुधना धरणामध्ये -११.७७ टक्के पाणीसाठा शिल्लक होता. करपरा आणि मासोळी मध्यम प्रकल्पांतील मृत पाणीसाठ्यातदेखील मोठी घट झाली आहे. जिल्ह्यातील २२ पैकी १० लघू तलाव आटले आहेत. ९ तलावांतील पाणीसाठा जोत्याखाली गेला आहे. फक्त ३ लघू तलावांमध्ये सरासरी १ टक्का उपयुक्त पाणीसाठा शिल्लक राहिला आहे. 

प्रकल्पांचे जलायशये तळ गाठत असल्यामुळे धरणांच्या काठी असलेल्या नळपाणीपुरवठा योजनांच्या उद्भव विहिरींना पाणी नसल्यामुळे अनेक गावांचा पाणीपुरवठा बंद आहे. त्यामुळे नदीकाठच्या अनेक गावांमध्ये जनावराच्या पाण्याचे संकट अधिक गंभीर झाले आहे.