नांदेड, परभणी, हिंगोलीत पीकविम्यास विलंब

नांदेड : नांदेड, परभणी, हिंगोली जिल्ह्यांतील एकूण ११ लाख ७७ हजार १०६ शेतकऱ्यांना सन २०१९ च्या खरिप हंगामातील सोयाबीन, अन्य पिकांच्या नुकसानीसाठी ६९४ कोटी ८७ लाख १३ हजार १९७ रुपयांचा विमा परतावा मंजूर करण्यात आला. त्यानंतर लाभार्थी शेतकऱ्यांच्या खात्यावर परताव्याची रक्कम जमा करण्यात आली. परंतु, पंधरा दिवसांचा कालावधी उलटला, तरी अद्याप शेतकऱ्यांच्या खात्यावर परताव्याची रक्कम जमा करण्यात आलेली नाही.

नुकसान भरपाई देताना कोणते निकष लावले, त्याबाबतची माहिती विमा कंपनीने कृषी विभागाकडे सादर केलेली नाही. बहुतांश मंडळातील शेतकऱ्यांच्या पीक नुकसानीचे प्रमाण सारखे आहे. मात्र, परताव्याच्या रकमेत मोठी तफावत असल्यामुळे शेतकऱ्यांमध्ये नाराजी आहे.

नांदेड जिल्ह्यातील ६ लाख ३० हजार ९५७ शेतकऱ्यांना सोयाबीन, उडीद, ज्वारी या पिकांच्या नुकसानीसाठी ३१३ कोटी ६९ लाख ५२ हजार ५३८ रुपये विमा परतावा मंजूर करण्यात आला आहे.  हिंगोली जिल्ह्यातील सोयाबीन आणि ज्वारी या पिकांच्या नुकसानीबद्दल १ लाख ४९ हजार ३२९ शेतकऱ्यांना ११७ कोटी ६५ लाख १० हजार ४७८ रुपये मंजूर झाले. सोयाबीन पिकाच्या नुकसानीचे प्रमाण सारखेच आहे. परंतु, प्रतिहेक्टरी विमा परताव्याचा दरात मात्र मोठी तफावत आहे. 

परभणी जिल्ह्यातील चाटोरी मंडळामध्ये सर्वाधिक ३० हजार ४७९ रुपये प्रतिहेक्टर, तर झरी मंडळामध्ये सर्वात कमी ५ हजार ५२१ रुपये प्रतिहेक्टर परतावा मंजूर करण्यात आला. नांदेड, हिंगोलीत मंजूर परताव्यात तफावत आहे. पीकविमा मंजुर होऊन पंधरा दिवसांहून अधिक कालावधी उलटला आहे. खात्यावर रक्कम जमा केलेली नाही.