लोहा, कंधारमधील शेतकऱ्यांना दुष्काळी अनुदान, पीकविमा द्या : राष्ट्रवादी युवक कॉँग्रेसची मागणी

माळकोळी, जि. नांदेड : लोहा आणि कंधार तालुक्यांत सध्या भीषण दुष्काळी परस्थिती आहे. शेतकऱ्यांना उत्पादन खर्चाच्या निम्मेही उत्पादन मिळाले नाही. शेतीमालाला भावही मिळाला नाही. त्यामुळे या भागातील शेतकरी कर्जबाजारी झाला. या परिस्थितीमुळे शेतकऱ्यांना पीकविमा परतावा, दुष्काळी मदत द्या, अशी मागणी राष्ट्रवादी युवक कॉँग्रेसचे प्रदेश सरचिटणिस दिलीप धोंडगे यांनी जिल्हा प्रशासनाकडे केली. 

मागील वर्षीचा पीकविमा तत्काळ मंजूर करावा, दुष्काळी अनुदानासह शेतकऱ्यांना प्रतिएकरी २५ हजार रुपये मदत द्यावी, रासायनिक खतांच्या वाढलेल्या किमती तत्काळ कमी कराव्यात, लिंबोटी धरणातून उदगीर आणि पालम शहरांसाठी पाणीपुरवठा करू नये, लोहा कंधार तालुक्यातील कोलमडलेली वीज वितरण व्यवस्था सुरळीत करावी, आदी मागण्यांचे निवेदन जिल्हाधिकाऱ्यांना देण्यात आले.

लोहाचे राष्ट्रवादी कॉँग्रेस तालुकाध्यक्ष संजय पाटील-कऱ्हाळे, जिल्हा कार्यध्यक्ष दत्ता पाटील, शिवदास धर्मापुरीकर, मनोहर पाटील- भोसीकर, बाबूराव केंद्रे, शिवराज पाटील-पवार, बाबासाहेब देशमुख, जि. प. सदस्य ॲड. विजय धोंडगे, राजकुमार केकाटे, दत्ता कारामुंगे, अच्युत मेटकर आदी उपस्थित होते.