खानदेशात खतांची मागणी घटली

जळगाव : खानदेशात मागील आठवड्यात खत टंचाईची तक्रार कमी झाली आहे. पावसाचा अभाव व वाढता खर्च या बाबी लक्षात घेता शेतकऱ्यांनी पिकांना खते देणे टाळले आहे. परिणामी, खतांची मागणी घटली आहे.

नंदुरबार, धुळे व जळगावात युरिया, १०.२६.२६, दाणेदार सुपर फॉस्फेटची मोठी टंचाई मागील दोन ते अडीच महिने होती. सद्यःस्थितीतही युरियाचा पुरवठा कमी आहे. परंतु, पूर्वहंगामी कापूस, केळी, ऊस व तृणधान्याचे अधिक उत्पादन, लागवड असलेल्या भागात मागील १० ते ११ दिवसांपासून पाऊस नाही. खते पावसाळी वातावरण (थंड) किंवा तुरळक पाऊस सुरू असताना अनेक शेतकरी पिकांना देत असतात. काही शेतकऱ्यांनी सोयाबीन, ज्वारी, ताग या पिकांना दुसऱ्यांदा रासायनिक खते देण्याचे नियोजन केले होते. परंतु, पावसाने दडी मारली. ऊन तापत आहे. उष्णता प्रचंड व पाऊस नसल्याने खतांवरचा खर्च वाया जाईल, या भितीने शेतकरी खते देत नसल्याचे चित्र आहे. 

जळगाव, धुळे व नंदुरबारमधील खतांच्या दुकानांसमोरील रांगांची स्थिती दूर झाली आहे. नंदुरबारमधील नवापूर, तळोदा, अक्कलकुवा या भागातही पाऊस नाही. या भागात खतांची मागणी ऑगस्टमध्येही अधिक असते. जूनमध्ये या भागात खतटंचाई अधिक जाणवत होती.

जळगाव जिल्ह्यात यावल, चोपडा, जळगाव, रावेर, मुक्ताईनगर आदी भागात रोज युरिया व इतर संयुक्त खतांची सुमारे १० ते ११ टन मागणी असायची. परंतु, या भागातील मागणी १० टक्क्यांवर आली आहे. अशीच स्थिती नंदुरबार जिल्ह्यातही आहे. धुळे जिल्ह्यातील साक्री, धुळे या भागात खतांची उचल आहे. परंतु, तेथेही पाऊस कमी आहे, असे सांगण्यात आले.

पाऊस नाही. पिकांची अवस्था बिकट होत आहे. खतांची खरेदी शेतकरी करीत नाहीत. कारण, हा खर्च वाया जाण्याची भीती आहे. - रमेश पाटील, शेतकरी, आडगाव (जि.जळगाव)