फळपीक विमा योजनेला मुदतवाढ देण्याची मागणी

पुणे  : राज्यातील दुष्काळी स्थिती आणि शेवटच्या दिवसांमध्ये सतत बंद पडणाऱ्या सर्व्हरमुळे फळपीक विमा योजनेला मुदतवाढ देण्याची मागणी शेतकऱ्यांनी केली आहे. 

मृग बहारामधील संत्रा, मोसंबी, डाळिंब, पेरू, लिंबू व चिकू या सहा फळपिकांसाठी ही विमा योजना आहे. बँकेकडून कर्ज घेणारे शेतकरी तसेच बिगरकर्जदार शेतकऱ्यांना विमा प्रस्ताव बँकांना सादर करण्याची मुदत फळपीकनिहाय वेगवेगळी ठेवली गेली. बिगरकर्जदार शेतकऱ्यांनी विमा प्रस्ताव बँकांना सादर करण्याची अंतिम मुदत संत्रा, पेरू, लिंबू या फळ पिकांकरिता १४ जून होती. चिकू व मोसंबी फळपिकासाठी एक जुलै तर डाळिंब पिकाकरिता १५ जुलै होती. 

महा ऑरगॅनिक ॲन्ड रेस्युड्यू फ्री फार्मर्स असोसिएशनचे (मोर्फा) अध्यक्ष, कृषिभूषण अंकुश पडवळे म्हणाले, की दुष्काळी स्थितीमुळे राज्यातील शेतकरी हवालदिल झाले आहेत. फळबागा जळत असल्यामुळे विमा उतरविण्यासाठी शेतकरी इच्छुक होते. मात्र, १० जुलैपासून सर्व्हर बंद होता. त्यामुळे शेतकऱ्यांना अर्ज भरता आले नाहीत. या योजनेमुळे कमी किंवा जास्त पाऊस, पावसाचा खंड व सापेक्ष आर्द्रता या हवामान धोक्यापासून विशिष्ट कालावधीसाठी विमा संरक्षण आणि आर्थिक सहाय्य मिळते. 

राज्यात यंदा डाळिंब बागांचे मोठे नुकसान झालेले आहे. काही बागा पूर्ण तर काही बागा अर्धवट जळलेल्या आहेत. काडीमध्ये स्टोअरेज नसल्याने बागा जिवंत राहून देखील उत्पादन मिळणार नाही. त्यामुळे विम्याच्या माध्यमातून थोडेफार नुकसान भरून निघेल, अशी आशा शेतकऱ्यांना आहे.  गेल्या हंगामात देखील फळपीक विमा योजनेला मुदतवाढ मिळाली होती. यंदा मुदतवाढ देण्याबाबत राज्याचे कृषी सचिव व आयुक्तांना कळविण्यात आले आहे, असे श्री.पडवळे यांनी स्पष्ट केले.