बंद अवस्थेतील कारखाने सहकारी तत्त्वावर सुरू करण्याची मागणी

जळगाव : जिल्ह्यात काही साखर कारखाने एकेकाळी जोमात सुरू होते. ऊस उत्पादनातही जिल्हा आघाडीवर होता. परंतु घटते उसाचे क्षेत्र व सहकरातील अनागोंदी यामुळे अनेक कारखाने बंद पडले. त्यांच्या विक्रीसाठी कारखान्यांचे माजी संचालक, स्थानिक नेते खासगी कंपन्या, उद्योजकांशी संपर्क साधत आहेत. परंतु हे कारखाने खासगी मंडळीला न सोपविता संबंधित तालुक्‍यातील शेतकरी कंपन्या, शेतकरी मंडळे यांना द्यावेत. शेतकरी, उद्योजक यांच्या भागीदारीने हे कारखाने चालवावेत, अशी मागणी शेतकऱ्यांनी केली आहे.

बंद पडलेला मुक्ताई कारखाना सुरू झाल्याने या भागात उसाचे क्षेत्र वाढून शेतकऱ्यांना त्याचा लाभ होईल. कारण तो स्थानिक शेतकऱ्यांच्या मदतीने चालविला जात आहे. असाच निर्णय चाळीसगावमधील बेलगंगा कारखान्यासंबंधी घेण्यात आला. आजघडीला गिरणा पट्ट्यात हा कारखाना सुरू होईल, याचा आनंद शेतकरी व्यक्त करीत आहेत. सध्या गोंडखेल (ता. जामनेर) येथील कारखाना विक्रीसंबंधीची चर्चा सुरू आहे. परंतु शेतकरी, सहकारी या भागीदारीने सुरू करण्याची मागणी होत आहे. गोंडखेल ग्रामपंचायतीने हा कारखाना खासगी मंडळीच्या ताब्यात जायला नको, अशी अपेक्षा व्यक्त केली आहे.

चोपडा येथील सहकारी साखर कारखाना शेतकऱ्यांच्या पुढाकाराने, स्थानिक नेत्यांच्या सहमतीने सुरू होत आहे. तो जेमतेम स्थितीत तग धरून राहण्यासाठी जिल्ह्यातील नेतृत्वाने, बॅंकांनी पुढाकार घ्यावा. एरंडोल तालुक्‍यातील वसंत सहकारी साखर कारखानाही अनेक वर्षांपासून बंद आहे. सध्या उसाचे क्षेत्र वाढू लागले आहे. कापूस कमी होत आहे. केळीही पुढे कदाचीत कमी होईल. मग उसाच्या पिकाचा पर्याय चांगला राहू शकतो. या स्थितीत जिल्ह्यात साखर कारखाने अधिकाधिक संख्येने सुरू व्हावेत, अशी अपेक्षा शेतकरी रंगराव पाटील (भडगाव) यांनी व्यक्त केली आहे.