चंद्रपूर कृषी विभाग देणार रानभाज्यांची माहिती

गोंडपिपरी, जि. चंद्रपूर ः अळू, काटवल, सूरण, टरोटा, टेना, बांबूचे वायदे, कुंदरभाजी, कुड्याची फुल आणि या सारख्या अनेक रानभाज्या खाण्यासाठी तसेच आरोग्यासाठी अतिउत्तम  आहेत. रानात राहणारे आदिवासी बांधव व जुनेजाणते आजही या भाज्या आवर्जून खातात. पण अनेकांना या वनसंपदेची माहितीच नाही. या उज्वल वनठेव्याची माहिती व्हावी यासाठी आता कृषी विभाग सरसावला आहे. येत्या नऊ ऑगष्ट रोजी जिल्ह्यातील संपूर्ण तालुका कृषी कार्यालयाअंतर्गत या रानभाज्यांचे प्रदर्शन भरविण्यात येणार आहे.

चंद्रपूर जिल्हा वनवैभवाने संपन्न आहे. येथील जंगलात मोठ्या प्रमाणावर दुर्मीळ वन्यजीव आढळतात. त्याचप्रमाणे मानवी जीवनास उपयोगी रानभाज्यांचा खजिना येथे आहे. मानवी आरोग्यास अतिशय लाभदायी ठरणाऱ्या विविध रानभाज्या जंगलालगत असणारे नागरिक चवीने खातात. पूर्वी आदिवासी बांधव व जुने जाणते नागरिकांना या भाज्यांची खडानखडा माहिती होती.पण आता मात्र या रानभाज्या, रानफुले, उपलब्ध असून देखील अनेकांना माहीत नाही. त्यामुळे  हा महत्त्वपूर्ण रानठेवा पूर्णतः दुर्लक्षित आहे. जंगली काटवल, कुड्याची फुले, कुंदरभाजी, टेना, तरोटा व अशा अनेक रानभाज्या रानफुलांची चव उत्तम असते. याचसोबत त्या आरोग्यासाठी अतिउत्तम आहेत.

कृषी विभागाच्या वतीने येत्या ९ ऑगष्ट रोजी जिल्ह्यातील संपूर्ण तालुका कृषी विभागाच्या कार्यालयात रानभाज्यांचे व रानफुलांचे प्रदर्शन भरविण्यात येणार आहे. यासाठी विभागाची यंत्रणा कामाला लागली आहे. अनुभवी, जाणते व ज्येष्ठ नागरिकांकडून रानभाज्यांची, रानफुलांची माहिती गोळा करण्याचे काम सुरू झाले आहे. स्वतः तालुका कृषी अधिकारी या उपक्रमाकरिता प्रकर्षाने परिश्रम घेत आहेत.

या उपयोगी रानठेव्याची माहिती प्रदर्शित झाल्यास नवीन पिढीला याची माहिती मिळणे सुलभ होणार असून त्यांच्यासाठी ते फायदेशीर ठरणार आहे. रानभाजी, रानफुले हे खाण्यास उपयुक्त असून आयुर्वेदिक औषधी म्हणून त्याचा उपयोग होत असल्याने त्याचे महत्त्व समजून घेणे काळाची गरज ठरली आहे.

येत्या ९ ऑगष्ट रोजी तालुका कृषी विभागाच्या वतीने गोंडपिपरीतील कार्यालयात रानभाजी महोत्सव होऊ घातला आहे. या प्रदर्शनाच्या माध्यमातून रानठेव्याची माहिती समोर येईल. त्याचा निश्चित फायदा होईल. - मंगेश पवार, तालुका कृषी अधिकारी, गोंडपिपरी