वीजदर सवलतीबाबत उपमुख्यमंत्री सकारात्मक 

कोल्हापूर : राज्यातील उच्च दाब आणि लघू दाब सहकारी उपसा जलसिंचन योजनेच्या वीजबिल सवलतीबाबत उपमुख्यमंत्री अजित पवार यांच्या अध्यक्षतेखाली मुंबईत बैठक झाली. या बैठकीत सकारात्मक निर्णयाची ग्वाही उपमुख्यमंत्री श्री. पवार यांनी दिल्याची माहिती राज्य इरिगेशन फेडरेशनच्या प्रतिनिधींनी दिली. 

सहकारी पाणीपुरवठा संस्था अनेक अल्प भूधारक शेतकऱ्यांच्या आहेत. या संस्था ३० ते ४० वर्षांपूर्वीच्या असल्याने पाइपलाइन लिकेज व मशिनरी दुरुस्ती खर्चात वाढ झाल्याने नवीन वीज दरवाढ परवडणारी नाही. राज्य शासनाचा पूर्वी प्रमाणेच अनुदान देऊन सवलतीचा दर कायम ठेवावा, अशी मागणी राज्य इरिगेशन फेडरेशनच्या प्रतिनिधींनी केली. उपसा जलसिंचन योजना दरमहा वेळेवर बिल भरतात, असेही त्यांनी निदर्शनास आणून दिले. सवलतीच्या मागणीवर ‘ऊर्जा’ व ‘महावितरण'ने अहवाल सादर केला. त्यात सवलतीची रक्कम राज्य शासनाने ‘महावितरण'ला दिल्यास पूर्वीप्रमाणे सवलतीचा दर कायम ठेवण्यास सहमती दर्शवली. 

बैठकीला ऊर्जामंत्री डॉ. नितीन राऊत, सहकारमंत्री बाळासाहेब पाटील, ऊर्जा राज्यमंत्री प्राजक्त तनपुरे, आमदार संग्राम थोपटे, आमदार अरुण लाड, महाराष्ट्र राज्य इरिगेशन फेडरेशनचे आर. जी. तांबे, विक्रांत पाटील- किणीकर, जे. पी. लाड, अंकुश जगताप, ‘महावितरण’चे व्यवस्थापकीय संचालक विजय सिंघल, ऊर्जा विभागाचे सचिव दिनेश वाघमारे आदी उपस्थित होते.