देशमुख बंधूंकडून उन्हाळ्यात जनावरांना मोफत हिरवा चारा 

बुलडाणाः शेतकऱ्यांची दानशूरता, दिलदारपणा आजवर अनेकदा समाजाने बघितला. जिल्ह्यातील सवडत येथील श्रीराम व शंकर अण्णाराव देशमुख हे भाऊ ऐन उन्हाळ्यात गावातील जनावरांना मोफत हिरवा चारा व पाणी पुरविण्याचे व्रत सांभाळत आहेत. त्यांच्या या कार्याचे आता सर्वत्र कौतुक होत आहे. 

आध्यात्मिक विचारांचा पगडा असलेल्या देशमुख बांधवांनी मागील काही वर्षांपासून जनावरांना मोफत चारा पुरविण्याचे काम हातात घेतले. सुरुवातीला त्यांनी गौरक्षण संस्थांमधील जनावरांसाठी चारा पोचवला. भैय्युजी महाराज स्थापित ऋषी संकुलातील जनावरांसाठी चारा दिला. आता गेल्या दोन वर्षांपासून ते शेतातच पंचक्रोशीतील जनावरांना हिरव्या चाऱ्याची सोय करतात. 

देशमुख यांच्याकडे २५ एकर शेती आहे. खरिपात कापूस बीजोत्पादन घेतात. इतरही पिकांचे चांगले उत्पादन काढतात. दानशूरपणातून त्यांनी गावातील जनावरांना हिरवा चारा पुरविण्याचे काम हातात घेतले. या कामातून मानसिक समाधान खूप मिळते, असे ते सांगतात. दरवर्षी सवडत ते शेगाव पायी वारी निघते. या वारीच्या नियोजनातही त्यांचा मोठा सहभाग राहतो. गजानन महाराजांचे निस्सीम भक्त, भैय्युजी महाराजांच्या विचारांचा पगडा जोपासणारे देशमुख बंधू आजच्या या व्यवहारिक काळात वेगळेपण जोपासत आहेत. 

रोज १५० जनावरांना देतात चारा  दरवर्षी रब्बीत १० ते १२ एकर मका लागवड करतात. पीक अंतिम टप्प्यात आले की त्याची कापणी सुरु करतात आणि गाव, परिसरातील गरजूंना शेतात जनावरे घेऊन येण्याचा निरोप देतात. दररोज जवळपास १५० जनावरांना ते हिरवा चारा पुरवितात. एप्रिलमध्ये हा चारा वाटपाचा उपक्रम सुरु करून तो पाऊस पडेपर्यंत सुरु ठेवतात. शेतातील चारा संपला की दुसऱ्यांकडून विकत घेऊन जनावरांना खाऊ घालतात. सोयाबीन, तूर, हरभऱ्याचे कुटार विकत घेऊन जनावरांना पुरवितात.