पूरबाधितांचे पुनर्वसन करण्यास कटिबद्ध :सुभाष देशमुख

पूरबाधितांचे पुनर्वसन करण्यास कटिबद्ध
पूरबाधितांचे पुनर्वसन करण्यास कटिबद्ध

सोलापूर : ‘‘दक्षिण सोलापूर तालुक्‍यातील काही गावांमध्ये पूरस्थिती उद्भवल्याने अनेक शेतकऱ्यांच्या पिकांचे नुकसान झाले. सध्या त्याचे पंचनामे सुरू आहेत. पूरग्रस्तांना दिलासा देण्यासाठी शासनाकडून अनेकांना तत्काळ भरपाई मिळाली आहे. उर्वरित पंचनामे पूर्ण होताच तीही मदत दिली जाईल. पूरग्रस्तांचे पुनर्वसन करणे हा आमचा प्राधान्याचा विषय आहे,’’ असे मत मदत व पुनर्वसनमंत्री सुभाष देशमुख यांनी व्यक्त केले.

भीमा नदीपात्रात उजनी व वीर धरणांतून सोडलेल्या पाण्यामुळे दक्षिण सोलापूर तालुक्‍यातील काही गावांना पुराचा वेढा पडला होता. त्यात वडापूर, कुसूर, खानापूर, तेलगाव, भंडारकवठे, बाळगी, सादेपूर, लवंगी, कारकल, औज (मं), कुरघोट, टाकळी येथे देशमुख यांनी पाहणी करून संबंधित अधिकाऱ्यांना योग्य त्या सूचना दिल्या. शेतकऱ्यांशी संवाद साधून परिस्थितीची माहिती घेतली. स्थलांतरित नागरिकांची विचारपूस केली. 

खानापूर येथील कुटुंबांचे तसेच तेलंगावसह अन्य काही गावांतील कुटुंबांचे पुनर्वसन करण्यासाठी सहकार्य करू, असे सांगून प्रशासनालादेखील योग्य ती मदत देण्याच्या सूचना देशमुख यांनी दिल्या. वडापूर येथे अनेक शेतकऱ्यांना पंतप्रधान शेतकरी सन्मान योजनेमधून लाभ मिळाला असून, काही जण लाभाच्या प्रतीक्षेत असल्याची माहिती गावकऱ्यांनी दिली. प्रत्येक शेतकऱ्याने आपले बॅंक खाते व्यवस्थित देण्याचे आवाहन या वेळी देशमुख यांनी केले. प्रसंगी चर्चेत गावकऱ्यांनी कांदा अनुदान, बॅरेजेसची त्रुटी पूर्ण करून कामाची गती वाढविणे, प्रलंबित कर्जमाफी, असे उर्वरित विषय मांडले.

भंडारकवठे गावातील पंचनामे झाले असून, पूरबाधित कुटुंबांना मदत मिळाली आहे. तेलगावमधील लोक बाधित आहेत. सर्वांच्या खात्यावर पैसे जमा झाले आहेत. बाळगी, सादेपूर, कारकल कुटुंबांना लाभ दिला आहे. औज (मं)  लोकांना मदत मिळाली आहे. कुरघोट लोकांना मदत, टाकळी  लोकांना मदत मिळाली आहे, अशी माहिती या वेळी संबंधित विभागाने दिली. या वेळी प्रांतधिकारी, पदाधिकारी, लोकप्रतिनिधी व संबंधित विभागाचे अधिकारी उपस्थित होते.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com