शेतकऱ्यांसाठी मोबाईल ॲप विकसित करावे ः जिल्हाधिकारी डॉ. चौधरी

सांगली ः ‘‘कृषिविषयक विविध योजनांची माहिती देणारे व शेतकऱ्यांना मार्गदर्शन करणारे मोबाईल ॲप विकसित करावे’’, अशा सूचना जिल्हाधिकारी डॉ. अभिजित चौधरी यांनी दिल्या.

कृषी तंत्रज्ञान व्यवस्थापन यंत्रणा (आत्मा)अंतर्गत जिल्हा नियामक सभेच्या अध्यक्षस्थानावरून ते बोलत होते. या वेळी जिल्हा अधीक्षक कृषी अधिकारी राजेंद्र साबळे, आत्माचे प्रकल्प संचालक बसवराज मास्तोळी, आत्माचे प्रकल्प उपसंचालक एस. जी. फाळके आदी अधिकारी उपस्थित होते. 

जिल्हाधिकारी डॉ. अभिजित चौधरी म्हणाले, ‘‘कृषी उत्पादन आणि पर्यायाने शेतकऱ्यांच्या एकूण उत्पन्नात वाढ करता यावी, यासाठी शेतकऱ्यांना दिशा मिळणे गरजेचे आहे. त्यादृष्टीने सांगली जिल्ह्याची पीक परिस्थिती आणि जिल्ह्यातील शेतकऱ्यांची गरज ओळखून मोबाईल ॲप्लिकेशन विकसित करण्याच्या दृष्टीने कार्यवाही करावी. या ॲपच्या माध्यमातून शेतकऱ्यांना पीक माहिती, कीड नियंत्रण, प्रशिक्षण, यशकथा यांची माहिती मिळणे शक्य होईल. तसेच, शेतकऱ्यांच्या शंकांचे निरसन होईल. हे ॲप यूझर फ्रेंडली असावे, जेणेकरून ते ग्रामीण भागातील व सामान्य शेतकऱ्यांनाही वापरता येईल.’’

त्याचबरोबर राष्ट्रीय शाश्वत शेती अभियानांतर्गत शेतकऱ्यांनी सेंद्रिय शेती करण्यासाठी जास्तीत जास्त प्रोत्साहन द्यावे व प्रबोधन करावे. तसेच, सेंद्रिय शेतीमाल विकण्यासाठी बांधण्यात येत असलेल्या सेंद्रिय जत्रा या मॉलचे काम लवकरात लवकर पूर्ण होण्याच्या दृष्टीने कार्यवाही करावी. ई मार्केटिंग, होम डिलिव्हरी आदींबाबत तसेच, स्थानिक मॉलमध्ये सेंद्रिय शेतीमाल विक्रीसाठी समन्वय साधावा, असे त्यांनी सूचित केले. तसेच, शेतकऱ्यांनी पारंपरिक शेतीऐवजी नवीन शेतीप्रयोगांकडे वळण्यासाठी अनुषंगिक मार्गदर्शन करावे. 

आगामी वर्षाचे नियोजन करताना प्रत्येक शेतकरी गटाशी जोडण्यासाठी पुढाकार घ्यावा. कृषी व मत्स्य, रेशीम विकास, पशुसंवर्धन आदी कृषिपूरक सर्व विभागांनी सक्रिय सहभाग नोंदवणे आवश्यक आहे. शेतकऱ्यांना प्रशिक्षण व अन्य अनुषंगिक बाबींसाठी साह्य करा. तसेच, कृषी व फळ प्रक्रियेवरही भर द्यावा, असे त्यांनी सांगितले.  

या वेळी कृषी उपसंचालक मकरंद कुलकर्णी, जिल्हा कृषी विकास अधिकारी विवेक कुंभार, उपविभागीय कृषी अधिकारी, तालुका कृषी अधिकारी, तालुका तंत्रज्ञान व्यावस्थापक, सहायक तंत्रज्ञान व्यवस्थापक, कृषी विभागाचे अधिकारी, कर्मचारी आदी उपस्थित होते.