कचारगडला `अ’ वर्ग पर्यटनस्थळाचा दर्जा देणार : देवेंद्र फडणवीस

गोंदिया ः कचारगड हे देशभरातील भाविकांचे श्रद्धास्थान आहे. या संस्थानच्या विकासासाठी त्याला ‘अ' वर्ग पर्यटनस्थळाचा दर्जा देण्याची घोषणा मुख्यमंत्री देवेंद्र फडणवीस यांनी केली. कचारगडचा विशेष विकास आराखडा तयार करण्यात यावा, महाराष्ट्र शासन आवश्‍यक तो निधी देईल, असे त्यांनी सांगीतले.  राष्ट्रीय गोंडवाना महा अधिवेशनाच्या उद्‍घाटनप्रसंगी सोमवारी (ता. १८) मुख्यमंत्री बोलत होते. केंद्रीय मंत्री नितीन गडकरी, पालकमंत्री राजकुमार बडोले, आदिवासी विकास मंत्री अंबरीश आत्राम, खासदार अशोक नेते, आमदार डॉ. परिणय फुके, संजय पुराम यांच्यासह मान्यवरांची या वेळी उपस्थिती होती. केंद्रीय मंत्री नितीन गडकरी यांच्या हस्ते या वेळी अटल आरोग्य शिबिराचे उद्‍घाटन करण्यात आले.  ‘‘कचारगड यात्रेची परंपरा खुप मोठी आहे. या ठिकाणी आदिवासी बांधव मोठ्या प्रमाणात येतात. मी महाराष्ट्राचा पहिला मुख्यमंत्री आहे, मला या ठिकाणी येऊन आशीर्वाद व दर्शनाचा लाभ घेता आला. या ठिकाणी मिळालेली आशीर्वादरूपी ऊर्जा राज्याच्या विकासासाठी प्रेरणा देणारी आहे,’’ असे मुख्यमंत्री म्हणाले.  नागपूर शहर गोंड राज्याने वसविले आहे, असे सांगून मुख्यमंत्री म्हणाले, की त्यांची नगररचना अप्रतिम होती. त्यांच्या काळातील किल्ले व विविध वास्तू पाहिल्यानंतर गोंडराजे किती पुरोगामी विचाराचे व दुरदृष्टी असलेले राजे होते याचा परिचय येतो. जल, जमीन व जंगल संवर्धनाचे काम आदिवासी समाजाने केले आहे.   केंद्रीय मंत्री नितीन गडकरी यांनी कचारगड संस्थानच्या विकास आराखड्यासाठी केंद्र स्तरावर पाठपुरावा करणार असल्याची ग्वाही दिली. त्यासोबतच कचारगड परिसरात मोबाईल कनेक्‍टिव्हिटीसाठी प्रयत्न करणार असल्याचेही त्यांनी सांगितले. समितीचे अध्यक्ष दुर्गाप्रसाद कोकाडे यांनी अनेक मागण्या आपल्या प्रास्ताविकातून मांडल्या.