राज्यात तातडीने दुष्काळ जाहीर करा : धनंजय मुंडे

धनंजय मुंडे
धनंजय मुंडे

मुंबई ः मराठवाड्यासोबतच संपूर्ण राज्यात या वर्षी अभूतपूर्व आणि भीषण दुष्काळाची परिस्थिती असताना अनेक विषयांवर बोलणारे मुख्यमंत्री दुष्काळाच्या प्रश्नावर गप्प का? असा सवाल विधान परिषदेचे विरोधी पक्षनेते धनंजय मुंडे यांनी उपस्थित केला आहे. सरकारी कागद रंगवण्यापेक्षा तातडीने दुष्काळ जाहीर करा, अशी आग्रही मागणीसुद्धा त्यांनी केली आहे.  मराठवाड्यात या वर्षी पावसाअभावी भीषण दुष्काळी परिस्थिती निर्माण झाली आहे. शेतकऱ्यांची पेरणी वाया गेली असून, आलेली थोडीफार पिके ही करपून आणि विविध रोगांनी ग्रासली आहेत. विदर्भ, उत्तर महाराष्ट्र आणि पश्चिम महाराष्ट्रातही अशीच परिस्थिती असल्याने शेतकरी हवालदिल झाला आहे. शेतीसोबतच पिण्याच्या पाण्याचा आणि जनावरांच्या चाऱ्याचाही प्रश्न आतापासूनच गंभीर बनला आहे. राज्यातील या भीषण परिस्थितीबद्दल धनंजय मुंडे यांनी तीव्र चिंता व्यक्त केली.  मागच्या पंधरा दिवसात मुख्यमंत्री सातत्याने मुंबई, बिल्डरांचे प्रश्न, विविध ठिकाणांच्या मेट्रोंच्या प्रश्नावर बोलत आहेत. मात्र आमचा मराठवाडा आणि राज्यातील बळिराजा ज्या दुष्काळाने होरपळून निघत आहे. त्यांच्याबद्दल आपण वारंवार मागणी करूनही एक चकार शब्दही का बोलत नाहीत, असा प्रश्न त्यांनी केला आहे. सरकारचे शेतकऱ्यांना वाऱ्यावर सोडण्याचे धोरण आहे का, असा सवाल उपस्थित करतानाच सरकारने केवळ सरकारी कागदे न रंगवता तातडीने दुष्काळ जाहीर करावा, शेतकऱ्यांना दिलासा द्यावा, अन्यथा या राज्यातील शेतकरी जगणार नाही, अशी भीती ही मुंडे यांनी व्यक्त केली आहे.| सरकारने केलेल्या कर्जमाफीची अद्याप नीट अंमलबजावणी नाही, मागील काळातील नैसर्गिक आपत्तींमधील जाहीर अनुदान अद्याप वाटप झालेले नाही. पीकविम्याचाही घोळ आहे आणि सरकार दुसरीकडे सक्तीची वीजबिल वसुली करीत आहे. खते बी-बियाण्यांच्या किमती वाढवून त्यांच्या जखमेवर मीठ चोळत असल्याचे मुंडे यांनी म्हटले आहे.  वीजबील माफ करावे सरकारने तातडीने दुष्काळ जाहीर करावा, ज्या कृषी निविष्ठा (खते, बी-बियाणे) यांच्या किमती वाढवल्या आहेत, त्या किमती कमी कराव्यात, या वर्षीचे वीजबिल माफ करावे, सक्तीची वीजबिल वसुली थांबवावी, दुष्काळी भागातील विद्यार्थ्यांची परीक्षा शुल्क, शैक्षणिक शुल्क माफ करावे, हमीभाव खरेदी केंद्र तातडीने सुरू करावीत, अशा मागण्याही मुंडे यांनी केल्या आहेत.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com