धनगर आरक्षणावरून गदारोळ

मुंबई : सत्ताधारी पक्ष धनगर समाजाला आरक्षणाच्या नावाखाली केवळ गाजर दाखवीत असल्याची टीका विरोधी पक्षनेते धनंजय मुंडे यांनी केली. धनगर आरक्षणावर पाच वर्षे सरकारला काहीही करता आले नसल्याने सरकारला त्यावर उत्तरही द्यायचे नसल्याने सत्ताधाऱ्यांनीच गोंधळ सुरू केला आहे का, असा सवाल उपस्थित करीत विरोधी पक्षनेते धनंजय मुंडे यांनी गुरुवारी (ता.२७) आरोप केला. धनगर समाजाच्या आरक्षणावरून सत्ताधारी आणि विरोधकांनी एकत्र मिळून केलेल्या गोंधळात विधान परिषदेचे कामकाज अनेकदा बंद पडले. धनगरांबरोबर मराठा आरक्षणावरून घोषणांचा कलगीतुरा रंगला होता. धनगर समाजाला आरक्षण देण्याचे गाजर दाखविले जात असल्याचा आरोप विरोधकांनी केला; त्याला सत्ताधारी पक्षाकडून, १४ मराठा मुख्यमंत्री झाले. पण, मराठा समाजास आरक्षण फडणवीस सरकारनेच दिले, अशा शब्दात विरोधकांना उत्तर देण्यात आले.  या चर्चेत भाग घेताना धनंजय मुंडे म्हणाले की, धनगर समाजाच्या आरक्षणावर सरकारला काही निर्णय करता आले नाही. सरकारने उत्तरही देऊ नये, यासाठी हा गोंधळ सुरू आहे का? . सभागृहाचे कामकाज पाच वेळा तहकूब काँग्रेसचे आ. भाई जगताप यांनी आरक्षणाबाबत केलेल्या वादग्रस्त वक्‍तव्यावरून सभागृहात कामकाज पाच वेळा घोषणाबाजी करून बंद पाडले. तालिका सभापती हुस्नबानो खलिफे यांनी धनगर आरक्षणावर चर्चा व्हावी, यासाठी कामकाज पुढे नेण्याचा प्रयत्न केला. भाई जगताप यांचे वक्‍तव्य तपासून कामकाजातून काढून टाकण्याविषयी सभागृहाला आश्‍वस्त केले. मात्र, जगताप यांनी सभागृहाची माफी मागावी, यावर सत्ताधारी कायम राहिल्याने परिषदेचे सभागृह दोनदा दहा मिनिटांसाठी, एक तासासाठी एकदा आणि दोन वेळा अर्ध्या तासासाठी बंद पाडले.