माजी आमदार धनराज महाले यांचा शिवसेनेत प्रवेश

 नाशिक  : नुकत्याच झालेल्या लोकसभा निवडणुकीत युतीची जागा भाजपला गेल्यामुळे उमेदवारीबाबत अडचण झाल्याने दिंडोरीचे माजी आमदार धनराज महाले यांनी शिवसेनेला रामराम करत राष्ट्रवादी काँग्रेसमध्ये प्रवेश केला होता. त्यांना राष्ट्रवादी काँग्रेसतर्फे उमेदवारी मिळाली खरी, मात्र राष्ट्रवादीतून भाजपत गेलेल्या डॉ. भारती पवार यांनी त्यांचा लोकसभेच्या निवडणुकीत पराभव केला. अखेर पुन्हा विधानसभा निवडणुकीच्या तोंडावर  धनराज महाले यांनी शुक्रवारी शिवसेना पक्षप्रमुख उद्धव ठाकरे यांच्या उपस्थितीत शिवसेनेत प्रवेश केला. 

तसेच माजी खासदार कचरू भाऊ राऊत यांचे चिरंजीव व नाशिक भाजपच्या महापौर रंजना भानसी यांचे बंधू दिलीप राऊत यांनीही शिवसेनेत प्रवेश केला. या वेळी ग्रामविकास राज्यमंत्री दादा भुसे, जिल्हा संपर्कप्रमुख भाऊसाहेब चौधरी, शिवसेनेचे खासदार संजय राऊत, सचिव मिलिंद नार्वेकर आदी उपस्थित होते.