अडत्याकडून ‘टीडीएस’ कपातीची बाजार समितीकडून चौकशी सुरू

अडत्याकडून ‘टीडीएस’ कपातीची बाजार समितीकडून चौकशी सुरू
अडत्याकडून ‘टीडीएस’ कपातीची बाजार समितीकडून चौकशी सुरू

धुळे  : शेतकऱ्यांकडून शेतमाल विक्रीनंतर अडतदारांकडून ‘टीडीएस’च्या नावाने केल्या जाणाऱ्या बेकायदेशीर वसुलीसंबंधी बाजार समिती प्रशासनाने चौकशी सुरू केली आहे. कुठल्या अडतदारांनी टीडीएस कपात कोणत्या कायद्यानुसार केली याची चौकशी प्रशासनाने सुरू केली आहे. ज्या शेतकऱ्यांकडून ही वसली झाली त्या हेंदरुण (ता. धुळे) येथील शेतकऱ्यांनाही बाजार समितीने बोलावले आहे.  धुळे बाजार समितीत टीडीएसच्या नावे शेतकऱ्यांकडून बेकायदेशीरपणे वसुली केली जात असल्याचे सविस्तर वृत्त ॲग्रोवनने शनिवारच्या अंकात (ता.१५) पान क्रमांक चारवर प्रसिद्ध केले. यामुळे अडतदारांमध्ये खळबळ उडाली आहे, तर बाजार समिती प्रशासन जागे झाले असून, ही वसुली कुणी केली आहे, याची माहिती घेण्यास सुरवात केली आहे. बाजार समितीत अनेक शेतकरी भाजीपाला, धान्य आणतात. हा टीडीएस भाजीबाजारातही वसूल केला का, याचाही उलगडा प्रशासनाने करायला सुरवात केली आहे.  यासंदर्भात पणन संचालकांकडे तक्रार अर्ज करणारे हेंदरूण येथील शेतकरी मोहन भिसे यांना बाजार समितीमधील अडतदाराने मोबाईलवर संपर्क साधून आपण यापुढे ही वसुली करणार नसल्याचीदेखील ग्वाही दिली. पण यासंदर्भात जिल्हा उपनिबंधक व बाजार समिती सचिव यांच्याकडेही लेखी तक्रार करण्याची भूमिका भिसे यांनी घेतली असून, या दोन्ही अधिकाऱ्यांच्या कार्यालयात संपर्क साधल्याचे भिसे म्हणाले.  बाजार समितीत अडत वसुली करणे कायदेशीर नाही; पण काही अडतदार टीडीएसच्या नावाने कशी वसुली करीत आहेत? याला कुठल्या कायद्याचा आधार आहे, अशा आशयाचे पत्र बाजार समिती प्रशासन अडत असोसिएशनला देणार आहे. तसेच भाजी व धान्य मार्केट यार्डातील अडतदारांसोबत बैठकही घेणार असल्याची माहिती बाजार समितीमधील सूत्रांनी दिली. ॲग्रोवनमध्ये प्रसिद्ध झालेल्या वृत्तानुसार आम्ही टीडीएसची कपात कुणी व किती केली याची माहिती घेण्यास सुरवात केली आहे. अडत असोसिएशनलाही पत्र दिले जाणार आहे. ज्या शेतकऱ्यांकडून ही वसुली झाली, त्यांनाही बोलावले आहे. त्यांच्याकडून नेमकेपणाने माहिती घेतली जाईल.  - दिनकर पाटील, सचिव, धुळे बाजार समिती

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com