धुळे ः धुळे-नंदुरबार जिल्हा बँकेची १७ जागांसाठी पंचवार्षिक निवडणूक सुरू आहे. त्यात येथील निवडणूक कार्यालयात गुरुवारी (ता. २१) झालेल्या छाननीअंती दाखल एकूण ११२ उमेदवारी अर्जांपैकी सात अर्ज अवैध, तर १०५ अर्ज वैध ठरले आहेत. या प्रक्रियेत प्रतिस्पर्धी उमेदवाराकडून अनुमोदक महिलेची खोटी स्वाक्षरी झाल्याचे निदर्शनास आले. त्यामुळे शिरपूर येथील सर्वपक्षीय शेतकरी विकास पॅनेलचे उमेदवार प्रभाकर चव्हाण बिनविरोध निवडून आले आहेत.
निवडणुकीत माघारीच्या ८ नोव्हेंबरच्या प्रक्रियेपूर्वीच आतापर्यंत सर्वपक्षीय शेतकरी विकास पॅनेलचे दीपक पाटील (शहादा), भरत माळी (तळोदा) आणि प्रभाकर चव्हाण (शिरपूर), असे तीन, तर शिवसेनेचे आमश्या पाडवी (अक्कलकुवा), असे चार उमेदवार बिनविरोध निवडून आले आहेत. त्याबाबत अधिकृत घोषणा माघारीची प्रक्रिया पार पाडल्यानंतर होईल. त्यामुळे एकूण १७ पैकी उर्वरित १३ जागांसाठी ही निवडणूक होईल. यात धुळे व नंदुरबार जिल्ह्यातील शिवसेनेच्या नेत्यांनी वेगळी चूल मांडली आहे.
त्यांच्याविरोधात भाजप, काँग्रेस व राष्ट्रवादी काँग्रेसचे सर्वपक्षीय शेतकरी विकास पॅनल लढत देईल. ही निवडणूक बिनविरोध होण्यासाठी शेतकरी विकास पॅनेलचे प्रमुख आमदार अमरिशभाई पटेल प्रयत्नशील आहेत. हे पॅनेल शिवसेनेचे नेते माजी आमदार चंद्रकांत रघुवंशी यांची मनधरणी करण्यात यशस्वी होते की नाही, या बाबत उत्सुकता आहे.
जिल्हा बँकेच्या येथील मुख्य कार्यालयात निवडणूक यंत्रणेचे कार्यालय आहे. तेथे गुरुवारी दाखल उमेदवारी अर्जांची छाननी झाली. तीत शिरपूर तालुका विविध कार्यकारी सहकारी संस्था मतदारसंघातून इच्छुक राजधर पाटील यांचा उमेदवारी अर्ज नामंजूर झाला. त्यामुळे त्यांचे प्रतिस्पर्धी एकमेव उमेदवार माजी नगराध्यक्ष प्रभाकर चव्हाण यांची बिनविरोध निवड झाली. अर्ज छाननीवेळी इच्छुक राजधर पाटील यांच्या अर्जावर अनुमोदक म्हणून स्वाक्षरी असलेली महिला उपस्थित झाली. तिने अर्जावर माझी स्वाक्षरी, आधारकार्ड नाही, असे सांगितले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.