नंदुरबार : कोरोनामुळे संचारबंदी व वाहनांना जिल्हाबंदी केल्याने केळी उत्पादक शेतकऱ्यांची अडचण झाली आहे. व्यापारी खरेदीस येत नसल्याने केळी झाडावरच पिकत आहेत. वाढलेल्या तापमानामुळे केळी खराब होण्याचे प्रमाण वाढले आहे. जिल्ह्यात शहादा, तळोदा, अक्कलकुवा भागात सुमारे २० ते २५ कोटींच्या केळीचे नुकसान लॉकडाऊनमध्ये झाल्याचा दावा शेतकरी करीत आहेत.
जिल्ह्यातून केळी राजस्थान, हरियाणा, पंजाब, दिल्ली, मध्यप्रदेशात पाठविली जाते. जिल्ह्यातील स्थानिक व्यापाऱ्यांसोबत या राज्यातील व्यापारी केळी खरेदीसाठी येतात. मात्र लॉकडाऊनमुळे राज्यातील व्यापारी येणे बंद झाले आहे.
जीवनावश्‍यक वस्तूंची वाहतूक सुरू असली तरी व्यापारी खरेदीसाठी यायला तयार नाही. केळी नाशवंत आहे. मोठ्या क्षेत्रात केळी काढणीवर आहे. परंतु काढणी वेळेत न झाल्याने अनेक शेतकऱ्यांची केळी झाडावरच किंवा बागेतच पिकली आहे. तिचे १०० टक्के नुकसान झाले आहे. एप्रिलच्या पहिल्या आठवड्यात जिल्ह्यात प्रतिदिन २५ ते २८ ट्रक (एक ट्रक १५ मेट्रिक टन क्षमता) केळीची आवक होत असते. मागील सात ते आठ दिवसात किमान २० ते २५ कोटींचे नुकसान झाल्याचा अंदाज आहे.
केळीची पाठवणूक सुकर व्हावी, खरेदीदारांना विश्‍वास दिला जावा व शेतकऱ्यांचे नुकसान टाळले जावे यासाठी उपाययोजना कराव्यात, अशी मागणी तहसीलदार यांच्याकडे तळोदा तालुक्‍यातील शेतकरी दिगंबर माळी, संदीप मगरे, राजकपुर मगरे, भरत माळी, संदीप सूर्यवंशी, नितीन बाविस्कर आदींनी केली आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.