शेतकरी वारकरी महासंमेलनात शेती विषयावर विचारमंथन

नगर ः शेतकरी मराठा महासंघातर्फे शनिशिंगणापूर (ता. नेवासा) येथे होत असलेल्या शेतकरी- वारकरी महासंमेलनात शेतीच्या व्यथा मांडल्या जाणार आहेत. शेतकरी- वारकरी महासंमेलनाचा हा राज्यातील पहिलाच प्रयोग असून, पन्नास हजारांच्या जवळपास शेतकरी-वारकरी उपस्थित राहणार आहेत, असे महासंमेलनाचे आयोजक संभाजी दहातोंडे यांनी दिली.  शेतकरी आत्महत्या थांबण्यासह शे़ती प्रश्नावर चर्चा करण्यासाठी वारकऱ्यांची मदत घेतली जाणार आहे. त्याचाच एक भाग म्हणून या बाबीवर चर्चा करण्यासाठी शनिशिंगणापूर येथे पहिल्याच शेतकरी-वारकरी महासंमेलन होत असून, गुरुवारी (ता. १५) मुख्यमंत्री देवेद्र फडणवीस यांच्या हस्ते सकाळी आकरा वाजता उद्घाटन होत आहे. अध्यक्षस्थानी पंढरपूर येथील चारोधाम ट्रस्टचे अध्यक्ष बद्रीनाथ महाराज तनपुरे महाराज असतील.  खासदार छत्रपती उदयनराजे भोसले, महसूलमंत्री चंद्रकात दादा पाटील, भास्कर गिरी महाराज, जलसंपदामंत्री गिरीष महाजन, पालकमंत्री राम शिंदे, मंत्री विजय शिवतारे, मराठा महासंघाचे राष्ट्रीय अध्यक्ष अॅड. शशिकांत पवार, शिर्डी संस्थानचे अध्यक्ष सुरेश हावरे यांच्यासह जिल्ह्यामधील लोकप्रतिनिधी उपस्थित राहणार अहेत. या संमेलनात डॉ. स्वामिनाथन आयोगाची अंमलबजावणी करावी, शेतीमालाला योग्य हमीदर मिळावा, नेवाशाला संतपीठ करावे, राज्यभर विभागवार वारकरी शिक्षण संस्था कराव्यात, शेतीमाल निविष्ठा नियामक मंडळ स्थापन करावे, यासह अन्य शेतीविषयक विषयांवर चर्चा होणार आहे. शेतकरी आत्महत्या थांबवण्यासाठी वाकरऱ्यांची कशी मदत घेता येईल यावरही विचारमंथन होईल. या वेळी गुजरातमधील खासदार सी. आर. पाटील यांचा समाजभूषण, स्व. बाबूराव बानकर यांचा जीवनगौरव, नारायण महाराज डौले यांचा वारकरी समाजभूषण, रंजना सुरेश बेल्हेकर यांचा शिक्षण समाजभूषण व श्रीधर ठाकरे यांचा कृषी समाजभूषण पुरस्काराने गौरव केला जाणार आहे, असे दहातोंडे म्हणाले.