सोलापुरात द्राक्षावर डाऊनी; पण नियंत्रणात

सोलापूर  ः जिल्ह्यात गेल्या आठवडाभरापासून सातत्याने निर्माण होत असलेले ढगाळ हवामान आणि अधूनमधून पावसाची हजेरी, यामुळे आगाप छाटणी केलेल्या द्राक्षबागांवर डाऊनीचा प्रादुर्भाव वाढतो आहे. जिल्ह्यात द्राक्षाचे एकूण क्षेत्र सुमारे २५ हजार एकरपर्यंत आहे. त्यापैकी १० ते २० टक्के क्षेत्राला त्याचा सर्वाधिक फटका बसल्याचा प्राथमिक अंदाज आहे. विशेषतः बार्शी, पंढरपूर, मोहोळ भागातील द्राक्षबागांवर हा प्रादुर्भाव दिसत आहे.

जिल्ह्यात फळबागांमध्ये डाळिंबानंतर द्राक्षाचे क्षेत्र सर्वाधिक आहे. जानेवारी-फेब्रुवारी हा द्राक्षाचा सर्वसाधारण हंगाम असतो. त्यासाठीची छाटणी ही १५ ते २५ ऑक्‍टोबरदरम्यान घेतली जाते. पण, या छाटणीचे सगळे गणित पावसावर अवलंबून असते. सहसा २० ऑक्‍टोबर हीच योग्य वेळ समजून छाटणी केली जाते. गेल्या दोन वर्षांपासून कमी होत असलेला पाऊस आणि त्याचे दिवस यामुळे बहुतांश छाटणी ऑक्‍टोबरमध्येच वेळेवर होते आहे.

यंदाही तशीच स्थिती होती. पण पंढरपूर, बार्शी आणि मोहोळच्या काही भागांत काही शेतकऱ्यांनी आधीच बऱ्यापैकी पाऊस झाल्याने आणि मुख्य हंगामाच्या अगोदर जास्त दर मिळेल, या अपेक्षेने सप्टेंबरमध्ये आगाप छाटणी केली. आता त्याच बागांवर ढगाळ हवामान आणि पावसामुळे डाऊनीचा प्रादुर्भाव वाढला आहे. अर्थात, हे क्षेत्र कमी असले, तरी त्याचे नुकसान अधिक आहे. गेल्या पाच-सहा दिवसांपासून तर सातत्याने ढगाळ वातावरण होत असल्याने आर्द्रतेचे प्रमाण वाढते आहे, परिणामी डाऊनीला पोषक वातावरण तयार होत आहे. त्यातही नवीन फुटलेल्या पानावर त्याचा प्रादुर्भाव जास्त दिसतो आहे. पण एकूण क्षेत्रापैकी १० ते २० टक्के क्षेत्राला त्याची झळ सोसावी लागत असल्याचे सांगण्यात आले. सध्या द्राक्ष उत्पादक आपापल्या परीने त्यावर उपाय करत असले तरी, डाऊनी कितपत नियंत्रणात येईल, हे हवामानावरच अवलंबून असेल.