सांगोल्यातील रोगग्रस्त डाळिंब बागांची तज्ज्ञांकडून पाहणी

सांगोला, जि. सोलापूर : वातावरणात होणारे बदल आणि सातत्याच्या पावसामुळे सांगोला तालुक्यातील डाळिंबाचे मोठे नुकसान झाले आहे. या नुकसानीची पाहणी मंगळवारी (ता. २७) राष्ट्रीय डाळिंब संशोधन केंद्र, महात्मा फुले कृषी विद्यापीठ, कृषी विज्ञान केंद्र आणि कृषी विभागाच्या विविध तज्ज्ञांकडून करण्यात आली.

सांगोला तालुक्यातील संगेवाडी, कोळा, जुनोनी या गावातील डाळिंबावरील कीड व रोगाची पाहणी या पथकाने केली. राष्ट्रीय डाळिंब संशोधन केंद्राच्या वरिष्ठ शास्त्रज्ञ डॅा. ज्योत्सना शर्मा, जिल्हा अधीक्षक कृषी अधिकारी रवींद्र माने, उपविभागीय कृषी अधिकारी सर्जेराव तळेकर, राष्ट्रीय डाळिंब संशोधन केंद्राचे डॉ. सोमनाथ पोखरे, कोरडवाहू फळे संशोधन प्रकल्प महात्मा कृषी विद्यापीठ राहुरीचे शास्त्रज्ञ अशोक वाळुंज, डॉ. प्रकाश मोरे, तालुका कृषी अधिकारी रमेश भंडारे, अखिल भारतीय डाळिंब उत्पादक संघाचे अध्यक्ष प्रभाकर चांदणे, अखिल महाराष्ट्र डाळिंब उत्पादक संघाचे उपाध्यक्ष प्रतापराव काटे, मध्यवर्ती विज्ञान समितीचे उपाध्यक्ष बरमु दुधाळ, संचालक खंडेराव मदने उपस्थित होते.

शास्त्रज्ञांनी विलास खंडागळे, सूर्यकांत खंडागळे, सन आलदर व लक्ष्मी माळी यांच्या डाळिंब बागेतील तेल्या व मर रोगाच्या जळालेल्या झाडांची पाहणी करून शेतकऱ्यांना या रोगाविषयी सविस्तर माहिती दिली. 

योग्यवेळी फवारणी करा

‘‘डाळिंबावरील विविध रोगाच्या नियंत्रणासाठी त्याचे व्यवस्थापन योग्य झाले पाहिजे. योग्य वेळी, योग्य औषधांची निवड करून फवारणी झाली पाहिजे. बागेवर औषधातील फवारणी करताना औषधातील घटकांची माहिती करून घेणे गरजेचे आहे’’, असे मत डॉ. शर्मा यांनी व्यक्त केले. ‘‘शेतकऱ्यांनी बागेची वेळोवेळी स्वच्छताही केली पाहिजे. आव्हान मोठे आहे. आपण ते पेलले पाहिजे’’, असेही त्या म्हणाल्या.