परभणी जिल्ह्यात ३१ टक्केच पीककर्जाचे वाटप

परभणी ः या वर्षीच्या (२०२१) खरीप हंगामात जिल्हा बॅंकेने पीक कर्जवाटपाची उद्दिष्टपूर्ती केली आहे. परंतु राष्ट्रीयकृत, ग्रामीण, खासगी बॅंकांचे पीक कर्जवाटप अडखळत सुरु आहे. शनिवार (ता.१७) पर्यंत सर्व बॅंकांनी मिळून एकूण ६५ हजार ५९१ शेतकऱ्यांना ३७६ कोटी २१ लाख रुपये (३१.०१ टक्के) पीक  कर्जवाटप केले. आजवरच्या वाटपात ६ हजार ६५ शेतकऱ्यांना नवीन पीककर्ज दिले. तर, ५९ हजार ५२६ शेतकऱ्यांनी पीककर्जाचे नूतनीकरण केले.

जिल्ह्यातील राष्ट्रीयकृत, ग्रामीण, सहकारी, खासगी क्षेत्रातील एकूण १७ बॅंकांना चालू आर्थिक वर्षात (२०२१-२२) खरीप हंगामात जिल्ह्यात १ हजार २१३ कोटी २२ लाख रुपये पीक कर्जवाटपाचा लक्ष्यांक आहे. त्यात राष्ट्रीयकृत बॅंकांना ७८१  कोटी ५८ लाख रुपये, खासगी बॅंकांना १०१ कोटी १८ लाख रुपये, महाराष्ट्र ग्रामीण बॅंकेला १८७ कोटी ६३ लाख रुपये, जिल्हा बॅंकेला १४२  कोटी ८३ लाख रुपये पीक कर्जवाटपाच्या उद्दिष्टांचा समावेश आहे.

सर्वाधिक उद्दिष्टाच्या राष्ट्रीयकृत (वाणिज्यक) बॅंकांनी आजवर ११  हजार ७५२ शेतकऱ्यांना ११८ कोटी ७८ लाख रुपये (१५.२० टक्के), खासगी बॅंकांनी १ हजार ३५५ शेतकऱ्यांना १६ कोटी २० लाख रुपये (१६.०१ टक्के), महाराष्ट्र ग्रामीण बॅंकेने १० हजार ४३९ शेतकऱ्यांना ८९ कोटी ६४ लाख रुपये (४७.७७ टक्के), जिल्हा बॅंकेने ४२ हजार ४५ शेतकऱ्यांना १५१ कोटी ५९ लाख रुपये (१०६.१३ टक्के) पीक कर्जवाटप केले. सर्व बॅंकांनी मिळून आजवर ६ हजार ६५ शेतकऱ्यांना ६२ कोटी ३५ लाख रुपयाचे नवीन पीक कर्जवाटप केले. एकूण ५९ हजार ५२६ शेतकऱ्यांनी ३१३ कोटी ८६ लाख रुपयांच्या पीककर्जाचे नूतनीकरण केले.