कर्तव्यावर असलेल्या तीन हजार पोलिसांना काकडीचे वाटप  

नाशिक : लॉकडाऊनचा सगळ्यात जास्त फटका शेती आणि शेतीपूरक व्यवसायाला बसला आहे. लाखो रुपयांची निर्यातक्षम शेतमाल अडचणीत सापडला आहे. त्यामुळे कष्टाने पिकविलेल्या हा शेतमाल असा फेकताना, सडताना पाहून अनेकांच्या पोटात धस्स होतं. पण अशाही परिस्थितीत निफाड तालुक्यातील शेतकरी शरद शिंदे यांनी तब्बल साडे आठशे किलो निर्यायतक्षम काकडी शेतातून काढून लॉकडाऊनमध्ये सर्वसामान्य नागरिकांसाठी दिवस रात्र रस्त्यावर उभ्या राहणाऱ्या पोलिसांसाठी भेट म्हणून दिली आहे. 

शरीराला लाभदायी ठरणारी काकडी भर उन्हात मिळाल्याने पोलिसांनीही या शेतकऱ्यांचे आभार मानले आहेत. शेतकऱ्याच्या संकल्पनेचे व औदार्याचे पोलिस आयुक्त विश्वास नांगरे पाटील यांनी देखील कौतुक केले आहे. निफाड तालुक्यातील खडक माळेगाव येथील शरद शिंदे हे प्रयोगशील युवा शेतकरी आहेत. देशसेवा करणाऱ्या हातांना आपलेही बळ लाभो या विचाराने शिंदे यांनी सुमारे आठ क्विंटल काकडी शहरातील बंदोबस्तावर असणाऱ्या पोलिस बांधवांना सामाजिक बांधिलकीचे भान ठेवून वाटप केले आहे. 

लॉकडाऊनमुळे शेतकरी अडचणीत आहे. मात्र, शेतकऱ्यांनी आपला शेतमाल नष्ट न करता, फेकून न देता तो लॉकडाऊनच्या कालावधीत प्रशासनातर्फे चालवल्या जाणाऱ्या निवारागृह, स्वयंसेवी संस्था, स्वयंसेवकांच्या माध्यमातून जनहितासाठी दान करावा.  - शरद शिंदे, प्रयोगशील युवा शेतकरी, खडक माळेगाव, ता. निफाड