भामरागड तालुक्‍यातील पूरग्रस्त शेतकऱ्यांना भाजीपाला किटचे वितरण

गडचिरोली  ः उपविभागीय अधिकारी कार्यालय गडचिरोली व रिपब्लिक महिला ट्रस्ट गडचिरोली यांच्या संयुक्‍त सहकार्याने भामरागड तालुक्‍यातील पूरग्रस्तांना भाजीपाला बियाण्याचे वितरण करण्यात आले. मॉन्सूनोत्तर पावसामुळे भामरागड तालुक्‍यातील नद्या, नाल्यांना पूर आला होता. या पुरामुळे परिसरातील शेती खरडून जाण्याचे प्रकार घडले. शेतकऱ्यांचे यामुळे मोठे नुकसान झाले. त्यासोबतच सुपीक मातीदेखील पाण्यासोबत वाहून गेली. याची दखल घेत उपविभागीय अधिकारी कार्यालय गडचिरोली व रिपब्लिक महिला ट्रस्ट यांच्या वतीने आपद्ग्रस्त शेतकऱ्यांना भाजीपाला बियाण्याचे वाटप करण्यात आले. पुरामुळे धान पीक वाहून गेल्याने शेतकऱ्यांकडे रब्बी हंगामात लागवडीकरिता बियाणे तसेच भाजीपाला बियाणे खरेदीसाठी देखील पैसे शिल्लक नव्हते. त्यामुळे परिसरातील शेतकरी रब्बी पीक व भाजीपाला उत्पादनापासून वंचित राहण्याची भीती होती. त्यासोबतच त्यांच्यासमोरील आर्थिक संकट आणखी गडद होणार होते. हे लक्षात घेत बियाणे वाटप कार्यक्रम राबविण्यात आला.  भामरागड तालुक्‍यातील हितापडी, हिदूर, आरेवाडा, फुलणार, जुवी, गुंडूरवाही, कोपर्शी येथील सुमारे ३०० शेतकऱ्यांना भाजीपाला बियाण्यांच्या मिनीकट वितरित करण्यात आला. या वेळी जयंत काऊटकर, वर्षा कुंभरे, कुंदा कुंभरे, अभिजीत कापगते यांची उपस्थिती होती.