हिंगोली, नांदेड, परभणीत आॅनलाइन नोंदणीत अडथळे

परभणी   ः आधारभूत किंमत खरेदी योजनेअंतर्गत मूग, उडीद, सोयाबीनच्या आॅनलाइन नोंदणीच्या कामात सर्व्हर बंद राहू लागल्याने अडथळे येत आहेत. स्वतंत्र पीक पेरा प्रमाणपत्र तसेच आंतरपीक पद्धतीत एका पिकाचे क्षेत्र निश्चित करण्यासाठी अडचणी येत आहेत. त्यामुळे नोंदणीचे काम संथगतीने सुरू आहे. परभणी आणि हिंगोली या जिल्ह्यांत सोमवारपर्यंत (ता. १५) एकूण २६८३  शेतकऱ्यांनी नोंदणी केली होती.

परभणी जिल्ह्यात नाफेडच्या परभणी येथील केंद्रावर २५४ शेतकऱ्यांनी, जिंतूर येथे ५४०, सेलू येथे १ हजार १४८, पूर्णा येथे ८६ असे एकूण २२६५ शेतकऱ्यांनी आॅनलाइन नोंदणी केली. हिंगोली जिल्ह्यातील हिंगोली येथे ३० शेतकऱ्यांनी, कळमनुरी येथे ६० शेतकऱ्यांनी, वसमत येथे ६० शेतकऱ्यांनी आॅनलाइन नोंदणी केली. सेनगाव आणि जवळा बाजार येथे नोंदणी सुरू झाली नव्हती.

विदर्भ को-आॅपरेटिव्ह मार्केटिंग फेडरेशनच्या मानवत आणि गंगाखेड येथील केंद्रांवर मुगासाठी १ हजार ९६ शेतकऱ्यांनी आणि सोयाबीनसाठी ६८९ शेतकऱ्यांनी कागदपत्रे सादर केली. त्यापैकी १२०१ शेतकऱ्यांची आॅनलाइन नोंदणी करण्यात आली. विदर्भ को-आॅपरेटिव्ह मार्केटिंग फेडरेशनच्या धर्माबाद (जि. नांदेड) येथील केंद्रांवर १३५ शेतकऱ्यांनी आॅनलाइन नोंदणी केली.

शेतकरी अडचणीत विविध ठिकाणच्या केंद्रांवर सर्व्हर डाउन राहत असल्यामुळे नोंदणीसाठी अडथळे येत आहेत. आॅनलाउन सातबारा उताऱ्यावर स्वतंत्र पीक नोंदणी करता येत नसल्यामुळे तलाठ्याकडून हस्तलिखित पेरा प्रमाणपत्र घ्यावे लागत आहेत. तूर अधिक सोयाबीन, तूर अधिक मूग आदी आंतरपिके घेतलेली असल्यास एका पिकाचे निव्वळ क्षेत्र निश्चित करण्यासाठी अडचणी येत आहेत. त्यासाठी शेतकऱ्यांना तलाठी कार्यालयात चकरा माराव्या लागत आहेत. खरेदी केंद्र सुरू करण्याबाबत सूचना नसल्याचे सांगितले जात आहे. या परिस्थितीत आर्थिक अडचणीत असलेल्या शेतकऱ्यांना बाजारामध्ये हमीभावापेक्षा कमी दराने शेतीमालाची विक्री करावी लागत आहे.