हुमणीच्या भुंगेऱ्यांचे वेळीच करा नियंत्रण

औरंगाबाद  : नुकतीच पूर्वमोसमी पावसाला सुरवात झाली आहे. त्यामुळे हुमणीचे प्रौढ भुंगेरे प्रजननासाठी बाहेर पडण्यास सुरवात झाली आहे. त्यांच्‍या नियंत्रणासाठी कृषी विभाग व कृषी विद्यापीठांच्या शास्त्रज्ञांच्या समन्वयातून शेतकऱ्यांना प्रत्यक्ष प्रात्यक्षिकांतून मार्गदर्शनाची मोहीम हाती घेण्यात आली आहे. 

शेतकऱ्यांनी आपल्या शेतात कडुलिंब, बाभळीच्या झाडाखाली अल्प खर्चाचा प्रकाश सापळा, एरंड आंबवण सापळा लावावा, असे आवाहन करण्यात आले. फुलंब्री तालुक्‍यातील बिल्डा येथे बुधवारी (ता. १२) सायंकाळी राष्ट्रीय कृषी संशोधन प्रकल्पाचे प्रमुख डॉ. एस. बी. पवार, तालुका कृषी अधिकारी मेघा पतंगे, जिल्हा परिषदेचे कृषी विकास अधिकारी आनंद गंजेवार, कृषी विज्ञान केंद्राचे विषय विशेषज्ञ डॉ. किशोर झाडे उपस्थित होते. 

एका प्रकाश सापळ्यात अधिकाधिक भुंगेरे अडकून पडून मरून जातात. असे १०० मादी भुंगेरे जर प्रकाश सापळ्यात मारले गेले,  तर एका सापळ्यामुळे मोठ्या प्रमाणात हुमणीची आळी नियंत्रित होते. एका गावात किमान १० शेतकऱ्यांनी सापळे लावले, तरी ५० हजार हुमणी अळ्या नष्ट होऊ शकतात. हे भुंगेरे २० ते २५ जूनपर्यंत दिसतील. या भुंगेऱ्यांचे वेळीच नियंत्रण करण्यासाठी शेतकऱ्यांनी पुढाकार घेण्याची गरज व्यक्त करण्यात आली.

...असा करा उपाय शेतातील कडुनिंब, बाभळीच्या झाडाखाली एक बल्ब (विजेचा किंवा चार्जिंग बॅटरीचा) लावा. त्याखाली मोठ्या घमेल्यात किंवा सपाट वाफा बनवून पाणी सोडावे. त्यात रॉकेल मिसळल्यास हुमणी भुंगेरे पडून मरून जातात.