काजुची  १२० रूपयेपेक्षा कमी दराने विक्री करू नयेः सतिश सांवत

सिंधुदुर्ग (प्रतिनिधी)ः बागायतदारांनी शेतपीक कर्ज घेऊन काजू उत्पादन केले आहे. तर कारखानदारांनी देखील बँकेतुन कर्ज घेऊनच उद्योग सुरू केले आहेत. सध्या कोरोनामुळे काजू व्यवसाय संकटात सापडला आहे. त्यामुळे ना नफा ना तोटा या तत्वावर हा व्यवसाय सुरू ठेवणे आवश्‍यक आहे. जिल्हा बँक हा प्रश्‍न सोडविण्यास सकारात्मक आहे. त्यामुळे  बागायतदारांनी १२० रूपयेपेक्षा कमी दराने काजुची विक्रीच करू नये, असे आवाहन जिल्हा बँकेचे अध्यक्ष सतिश सांवत यांनी केले.

पालकमंत्री उदय सांमत यांच्या सुचनेनुसार दोडामार्ग तहसिलदारांनी तहसिल कार्यालयात बागायतदार आणि कारखानदारांची सयुंक्त बैठक बोलविली होती. या बैठकीला तहसिलदार मोरेश्‍वर हाडके, शिवसेना जिल्हाप्रमुख संजय पडते, बँकेचे संचालक प्रकाश गवस, कृषी अधिकारी अतुल कांबळे, प्रेमानंद देसाई, आदी उपस्थित होते.

श्री. सांवत म्हणाले, कोरोनामुळे जर कुणी काजु बीयांची ६० किंवा ७० रूपयाने खरेदी करीत असेल तर ती शेतकऱ्यांची पिळवणूक आहे. कुणीही १२० रूपयेपेक्षा कमी दराने खरेदी करू नये. जर तशा प्रकारे खरेदी करण्याचा प्रयत्न करीत असेल तर योग्य तोडगा काढण्यासाठी जिल्हाधिकाऱ्यांचे लक्ष वेधले जातील, असे त्यांनी स्पष्ट केले. 

काजु बी हा नाशवंत घटक नाही त्यामुळे शेतकऱ्यांनी हतबल होऊ नये. पीककर्ज घेतलेल्या शेतकऱ्यांनी जिल्हा बँकेकडे परिपुर्ण प्रस्ताव सादर केल्यानतंर त्यांना सवलत दिली जाईल आणि सध्याची पैशाची गरजही भागविली जाईल. कोरोनामुळे काजुचे दर अजिबात कमी होणार नाहीत. शेतकऱ्यांनी लॉकडाऊन संपेपर्यंत काजुचा साठा करून ठेवावा, असे आवाहन देखील श्री. सांवत यांनी केले. याशिवाय आर्थीक गरज असलेल्या शेतकऱ्यांनी सोसायटीमार्फत मागणी करावी असेही त्यांनी सुचित केले.