सोयाबीन विक्रीची घाई नको

नागपूर : मुहूर्ताचे दर पाहून शेतकऱ्यांकडून अधिक आर्द्रता असलेले सोयाबीन विक्रीसाठी आणले जात आहे. मात्र सरसकट सोयाबीनला वाढीव दर मिळत नसल्यामुळे शेतकऱ्यांच्या पदरी निराशा पडते. त्यामुळे शेतकऱ्यांनी सोयाबीन विक्रीची घाई न करता टप्प्याटप्प्याने बाजारत आणण्याचे आवाहन बाजार विश्‍लेषकांकडून केले जात आहे.

राज्यातील अनेक बाजार समित्यांमध्ये सोयाबीनची पहिल्यांदा आवक झाल्यानंतर मुहूर्ताच्या या शेतीमालाला नऊ हजार ते १० हजार रुपयांचा दर मिळाला. अनेक शेतकऱ्यांनी या लिलावाचे व्यवहार व्हिडिओ रेकॉर्डिंग करून ते सोशल मीडियावर व्हायरल केले. त्यासोबतच विक्री पावतीचा फोटो देखील व्हायरल करण्यात आला. अनेक व्हॉट्सअॅप ग्रुपवर देखील हे फोटो आजही फिरत आहे. त्यामुळे शेतकऱ्यांकडून अधिक आर्द्रता असलेले सोयाबीनच विक्रीसाठी आणले जात आहे. 

प्रक्रिया उद्योजकांकडून सरासरी १० टक्के आर्द्रता असलेले सोयाबीन खरेदी केली जाते. सध्या नव्या सोयाबीनमध्ये दुप्पट म्हणजे २० टक्के आर्द्रता आहे. त्यासोबतच काही भागात पाण्याने डागाळलेले सोयाबीन देखील बाजारात पोहोचत आहे. अशा वेळी शेतकऱ्यांनी विक्रीची घाई न करता चांगला दर पदरात पाडून घेण्यासाठी टप्प्याटप्प्याने सोयाबीनची विक्री केली पाहिजे, असे आवाहन बाजार विश्‍लेषकांकडून केले जात आहे. 

वाशीम सोयाबीन खरेदी-विक्रीचे हब समजल्या जातो. याच जिल्ह्यातील कारंजा बाजार समितीमध्ये सोमवारी (ता. २०) ८०० क्विंटल सोयाबीनची आवक नोंदविण्यात आली. नागपूरच्या कळमणा बाजार रोज अवघी आठ क्विंटल आवक होत असून, दर ६३०० ते ७००० रुपये असा होता. पाच हजार ते सहा हजार पाचशे रुपये क्विंटल असा दर मिळाला.

शेतकऱ्यांनी चांगले दर पदरात पाडून घेण्यासाठी एकाच वेळी सोयाबीन विक्रीसाठी न आणता टप्प्याटप्प्याने ते विक्रीसाठी आणले पाहिजे.  - नीलेश भाकरे, सचिव, कारंजा बाजार समिती, वाशीम