पदविकाधारकांना कृषिसेवेचे दरवाजे बंद होण्याची शक्यता

 पुणे : राज्याच्या शेतकरी कुटुंबातील हजारो युवक दहावीनंतर कृषी पदविका प्राप्त करतात. मात्र, ग्रामविकास विभागानंतर आता या पदविकाधारकांना कृषी खात्याचेदेखील दरवाजे बंद होण्याची शक्यता वर्तविली जात आहे.  ग्रामविकास खात्याकडून २०१२ पर्यंत ग्रामसेवक भरतीसाठी कृषी पदविकाधारकांमधून भरले जात होते. मात्र, तत्कालीन सरकारने ग्रामसेवक पदासाठी बारावीच्या ६० टक्के गुणधारकांनादेखील संधी दिल्यामुळे ग्रामसेवकपदासाठी भरमसाट अर्ज येऊ लागले. त्यामुळे कृषी खात्यातील कृषिसेवक हे एकमेव पद पदविकाधारकांसाठी राखीव होते.  कृषी खात्याने यंदा परिक्षेत ‘पदविके’च्या विद्यार्थ्यांना ‘पदव्युत्तर’चे प्रश्न विचारले आहेत. त्यामुळे हजारो विद्यार्थी नापास होण्याची शक्यता आहे. यातील चार विद्यार्थ्यांनी महाराष्ट्र प्रशासकीय न्यायाधीकरणाकडे (मॅट) दाद मागितली आहे. “राज्य शासनाला मॅटने नोटिसा पाठविल्या आहेत. याच आठवड्यात शासनाकडून आपली भूमिका न्यायालयासमोर मांडली जाईल. २०० गुणांच्या या परीक्षेत १२० प्रश्न कृषी क्षेत्राशी निगडित होते. मात्र, त्यातही फक्त २५ टक्के प्रश्न हे पदविकाधारकांच्या स्तराचे होते. जाहिरातीमध्ये पदविकेचा उल्लेख असताना ७० टक्के प्रश्न पदवी व पदव्युत्तरचे का विचारण्यात आले, असा सवाल आम्ही याचिकेत केला आहे,’’ अशी माहिती विद्यार्थ्यांनी दिली.  पदविकाधारकांसाठी आता कृषी खात्याच्या सेवेचे मार्गदेखील बंद होण्याची शक्यता आहे. त्यामुळे पदविकाधारकांसाठी अभ्यासक्रमाची उपयुक्तता आहे काय, याचाही आढावा कृषी विद्यापीठांनी घ्यावा, अशी माहिती विद्यार्थ्यांनी दिली.  गणिताचेही प्रश्‍न विचारले... कृषी सेवक भरतीमध्ये बौद्धिक चाचणीऐवजी गणिताचे प्रश्न विचारण्यात आल्याचादेखील दावा विद्यार्थ्यांनी केला आहे. परीक्षेची काठिण्यपातळी वाढवून पदविकाधारकांना नापास करण्याच्या हेतूने ही परीक्षा घेण्यात आली. आमच्या भवितव्याशी खेळण्याचा हा प्रयत्न आहे, असेही विद्यार्थ्यांचे म्हणणे आहे.