नाशिक जिल्ह्यात सोयाबीन बियाणे न उगवण्याने दुबार पेरण्या

नाशिक : खरिपाच्या सुरुवातीला चांगला पाऊस झाला. त्यानंतर अनेक शेतकऱ्यांनी सोयाबीन पेरणी केल्या. मात्र, पेरणीनंतर सततचा पाऊस तसेच निकृष्ट बियाणे या दुहेरी समस्या उद्भवल्या. त्यामुळे उगवणक्षमतेच्या अडचणी आल्या आहेत. त्यामुळे हंगाम वाया जाऊ नये, यासाठी पूर्वीच्या पेरण्या मोडून जिल्ह्यात आता पुन्हा बियाणे उपलब्ध करून दुबार पेरण्या सुरू आहेत.

प्रामुख्याने निफाड, नाशिक, चांदवड व येवला तालुक्यातील अनेक गावांमधून या तक्रारी पुढे येत आहेत. अनेक प्रामुख्याने बियाणे उत्पादक कंपन्यांच्या तक्रारी पुढे येऊ लागल्या आहेत. काही शेतकऱ्यांनी बियाणे खरेदी केले. मात्र, गोणी खोलल्यानंतर कुजलेले व बुरशी लागलेले बियाणे शेतकऱ्यांना मिळाले. यावर शेतकऱ्यांनी बियाणे विक्रेत्यांनी हात वर केले आहेत. त्यामुळे शेतकरी अडचणीत सापडला आहे.

नाशिक तालुक्याच्या दक्षिण भागात शेवगे दारणा, नानेगाव, पळसे या भागात दुबार पेरण्यांना वेग आला आहे. मात्र, अनेक ठिकाणी आता ओल कमी झाल्याने दुबार पेरणी करताना अडचणी येत आहेत. एकंदरीतच घरचे बियाणे उतरले. मात्र, विकत आणलेले बियाणे उतरलेले नाही, असा सूर शेतकऱ्यांमध्ये  आहे.

बियाणे विक्रेत्यांचे हात वर 

बियाणे न उतरल्यावर जेंव्हा शेतकरी बियाणे विक्रेत्यांकडे धाव घेत आहेत. मात्र, काही बियाणे विक्रेते उडवाउडवीची उत्तरे देऊन शेतकऱ्यांना बाजूला करतात. आमचा काय दोष, असे त्यांच्या म्हणणे आहे. मात्र, जर बियाणे विक्रेत्यांचा दोष नाही, तर पुढच्या कंपनीला का जबाबदार धरत नाहीत. तसेच कृषी विभागाकडे तातडीने का तक्रार नाहीत, हा सवाल शेतकऱ्यांनी उपस्थित केला. प्रतिक्रिया... चालू वर्षी विकत आणलेल्या सोयाबीन बियाण्यांचा अनुभव खराब आहे. बियाणे विक्रेत्याकडे तक्रार केल्यानंतर सकारात्मक उत्तरे देत नसल्याने शेतकरी नाडला जातो. आमचे शारीरिक, आर्थिक व मानसिक नुकसान झाले आहे. - ज्ञानेश्वर कासार, शेतकरी, शेवगे दारणा, जि. नाशिक

शासन फक्त जाहिरात व घोषणा करत आहे. कृषी विभागाकडून गुणवत्ता व नियंत्रण याबाबत दुर्लक्ष आहे. त्यामुळे ऐन हंगामात नुकसान झाले. विक्रेत्यांकडे तक्रार केल्यानंतर सर्व बियाणे असेच असल्याचे सांगत हात वर केले जात आहेत. शासनाने लक्ष घालावे. - विलास गायधनी, शेतकरी, पळसे, जि. नाशिक