कृषी उद्योजकता विकास महत्त्वाचाः डाॅ. भाले

अकोला ः कृषी उद्योजकता विकास अतिशय महत्त्वाचा असून कृषी क्षेत्रातील विद्यार्थ्यांची यामध्ये अतिशय महत्त्वाची भूमिका आहे. भविष्यात कृषीमध्ये हरित क्रांतीसाठी कृषी अभियांत्रिकी तंत्रज्ञानाची भूमिका महत्त्वाची, असे मत पंजाबराव देशमुख कृषी विद्यापीठाचे कुलगुरू डॉ. व्ही. एम. भाले यांनी व्यक्त केले. पंजाबराव देशमुख कृषी विद्यापीठात एकविसाव्या शतकामध्ये भारतीय अर्थव्यवस्था सबलीकरणामध्ये कृषी पदवीधरांची भूमिका या विषयावर कार्यशाळा घेण्यात आली. या वेळी प्रमुख पाहुणे म्हणून माजी कुलगुरू डॉ. व्ही. एम. मायंदे, डॉ. पंजाबराव देशमुख जैविक शेती अभियानाचे अध्यक्ष प्रकाश पोहरे उपस्थितीत होते. या कार्यक्रमाच्या अध्यक्षस्थानी कुलगुरू डॉ. व्ही. एम. भाले होते.  डॉ. मायंदे म्हणाले, दरवर्षी कृषिपदवी पूर्ण केलेल्या विद्यार्थ्यांची संख्या महाराष्ट्रात खूप जास्त असून राज्य देशामध्ये याबाबतीत प्रथम क्रमांकावर आहे. एवढ्या मोठ्या प्रमाणावर रोजगार उपलब्ध नसल्याने विद्यार्थ्यांनी कृषी उद्योग स्थापनेवर भर द्यावा व उद्योजक बनण्याच्या हेतूने वाटचाल करावी. म्हणजे यामुळे कृषी क्षेत्रात रोजगारनिर्मिती होईल. कृषी अभ्यासक्रमात जागतिकस्तरावरील कृषी तंत्रज्ञान विकासाचा आढावा घेऊन त्यामध्ये वेळोवेळी सुधारणा व आवश्यक बदल करण्यात यावे. हे काम सद्य:स्थितीत दर दहा वर्षांनी होते पण ते दर एक ते दोन वर्षानी करण्यात यावे,’’ असे मत त्यांनी यावेळी व्यक्त केले. प्रकाश पोहरे यांनी भारतीय अर्थव्यवस्थेमध्ये सुधारणेसाठी विदेशात भारतीय मालाची मागणी वाढवणे तसेच जास्तीत जास्त निर्यातीवर भर देणे आवश्यक असल्याचे सांगितले. या कार्यशाळेमध्ये वसंतराव नाईक मराठवाडा विद्यापीठाचे माजी अधिष्ठाता डॉ. आर. जी. नादर, डी. सी. गोखले, डॉ. व्ही. के. खर्चे, एस. बी. नानोटे यांनीही मनोगत मांडले. कार्यक्रमाच्या सुरवातीस डॉ. सुरेंद्र काळबांडे यांनी सदर कार्यशाळेविषयी माहिती दिली.