आता तणसापासून होणार इथेनॉल उत्पादन : डॉ. फुके

भंडारा ः तणसापासून इथेनॉल निर्मिती प्रकल्प येत्या दोन वर्षात पूर्णत्वास येणार आहे. तब्बल १५०० कोटी रुपयांची तरतूद त्याकरिता करण्यात आली असून शेतीवेस्ट म्हटल्या जाणाऱ्या तणसाचे या माध्यमातून मूल्यवर्धन होईल, असा विश्‍वास पालकमंत्री डॉ. परिणय फुके यांनी व्यक्‍त केला.  तणसापासून इथेनॉल व सीएनजी निर्मिती प्रकल्पाकरिता जागेची पाहणी त्यांनी केली. त्यानंतर आयोजित जाहीर सभेत ते बोलत होते. अपर जिल्हाधिकारी विलास ठाकरे, जे. बी. संगीतराव, कार्यकारी अभियंता डी. एन. नंदनवार, तहसीलदार अक्षय पोयाम, बीपीसीएलचे संजीव पोळ या वेळी उपस्थित होते.  डॉ. परिणय फुके म्हणाले, ‘‘मकरधोकडा येथे शासनाच्या १४६.७ हेक्‍टरपैकी ४७.७५ हेक्‍टरवर हा प्रकल्प उभारण्यात येणार आहे. भंडारा, गोंदिया जिल्ह्यातील १० ते १५ हजार युवक, युवतींना या ठिकाणी रोजगार प्राप्त होईल. भंडारा, गोंदिया जिल्ह्यातील तब्बल २ ते ३ लाख टन तणस या प्रकल्पासाठी लागणार आहे. यातून शेतकऱ्यांना सात ते आठ हजार रुपये हेक्‍टरी मोबदला मिळू शकतो. त्यामुळे धानाचे तणस या पुढे शेतकऱ्यांनी जाळू नये. हा प्रकल्प १५०० कोटीचा असून १०० एकर जमीन त्याकरीता लागणार आहे. अधिकची जमीन मागणी करणे व उपलब्ध करुन देणे याबाबत सूचना देण्यात आल्या असून एम.आय.डी.सी. त्याकरीता सहकार्य करेल. या स्वरुपाचे भारतात १२ प्रकल्प उभारण्यात येत असून कार्यान्वीत होत आहेत. ३.८४ लाख टन तणस भंडारा जिल्हयात तर गोंदिया जिल्हयात ३.४६ लाख टन तणस उपलब्ध आहे. हे सर्व जाळल्या जात असून आता त्यापासून इथेनॉल व गॅसची निर्मिती होईल.