ढगाळ वातावरणामुळे सोलापुरात तापमानात घट

सोलापूर  : यंदाच्या उन्हाळ्यातील सर्वाधिक ४१.७ अंश सेल्सिअस तापमानाची नोंद ५ एप्रिलला झाली. उन्हाचा कडाका वाढला की ढगाळ वातावरण होत असल्याचा आजपर्यंतचा अनुभव आहे. आज सोलापूर शहर व परिसरात ढगाळ वातावरण राहिल्याने कमाल तापमानात घट झाली. आज सोलापूर शहर व परिसरात ३८ अंश सेल्सिअस कमाल तापमानाची नोंद झाली.

गेल्या काही दिवसांपासून सोलापूर शहर व परिसरातील तापमानाची कमालीचा चढउतार होत आहे. एप्रिलमध्ये आतापर्यंत सर्वात कमी ३४.६ अंश सेल्सिअस तापमानाची नोंद ८ एप्रिलला झाली तर सर्वाधिक ४१.७ अंश सेल्सिअसची नोंद ५ एप्रिलला झाली. अवघ्या दहा दिवसांमध्ये सोलापूर शहर व परिसरातील वातावरणात कमालीचा बदल जाणवत आहे. सोलापूर शहर व परिसरात १४ एप्रिलपर्यंत ढगाळ वातावरण राहिल. या दरम्यान मध्यम ते हलका पाऊस होईल, असा अंदाजही भारतीय हवामान विभागाने व्यक्त केला आहे. काही शेतकऱ्यांची द्राक्ष अद्यापही काढायची शिल्लक आहेत. ढगाळ वातावरण व अवकाळी पावसाच्या शक्‍यतेने द्राक्ष उत्पादकांची चिंता वाढली आहे.

एप्रिलमध्ये ४२ ते ४३ अंश सेल्सिअस सोलापूर शहर व परिसरात एप्रिलमध्ये सरासरी ४२ ते ४३ अंश सेल्सिअस दरम्यान, कमाल तापमान रहात असल्याचा आजपर्यंतचा अनुभव आहे. एप्रिलमध्ये सर्वाधिक ४४.९ अंश सेल्सिअस तापमानाची नोंद २२ एप्रिल २०१६ मध्ये झालेली आहे. एप्रिलमध्ये पाऊसही झाल्याच्या नोंदी आहेत. एप्रिलमध्ये एकाच दिवशी सर्वाधिक ५२.४ मिलीमीटर पाऊस १३ एप्रिल १९९६ रोजी झाल्याचीही नोंद आहे.