खानदेशात दिवाळीमुळे केळी लागवडीला तात्पुरता ‘ब्रेक`

जळगाव ः खानदेशात कांदेबाग केळीची रखडत सुरू असलेली लागवड या आठवड्याच्या अखेरीस तात्पुरती थांबली आहे. दिवाळीनिमित्त कंद काढणी, त्याचा पुरवठा व लागवड ही कामे बंद आहेत.  

कांदेबाग केळी लागवड यंदा वाढेल, अशी अपेक्षा होती. ही लागवड सुरू झाली. पण, ऑक्टोबरमध्ये पाऊस आला. यामुळे लागवड रखडली. कांदेबाग केळी लागवड ऑक्टोबरमध्ये बंद होते. काही शेतकरी उशिरा लागवडीच्या बागांबाबत कार्यवाही करतात. परंतु, पावसामुळे पूर्वमशागत व इतर कामे ठप्प होती.

कंद काढता येत नव्हते. लागवड ऑक्टोबरच्या अखेरीस वेगात सुरू झाली. ही लागवड लांबली आहे. आता दिवाळी सणानिमित्त लागवडीसाठी आवश्यक कंद काढणीचे काम ठप्प आहे. 

शेतकरी रावेर, यावल, मुक्ताईनगर, औरंगाबाद नंदुरबार जिल्ह्यातूनही कंद आणतात. कांदेबाग केळीची लागवड चोपडा, जळगाव, पाचोरा, भडगाव या भागात केली जाते. ही लागवड खानदेशात सुमारे १० ते ११ हजार हेक्टरवर अपेक्षित आहे. यातील सुमारे ७५ टक्के लागवड पूर्ण झाली आहे. तर, उर्वरित लागवड रखडली आहे. आता पुढील आठवड्यात ही लागवड पूर्ण होईल, अशी स्थिती आहे. कारण, दिवाळीमुळे कंदांची वाहतूकही खोळंबली आहे. 

लागवडीसाठी प्रतिकंद एक रूपया

लागवड गेल्या आठवड्यात वेगात सुरू होती. अशातच कंदांचे दरही वाढले. सुरवातीला शेतकरी कंद मोफत देत होते. परंतु, या आठवड्यात लागवड करणाऱ्या शेतकऱ्यांना प्रतिकंद एक रुपया द्यावा लागत आहे, अशी माहिती मिळाली.