पावसाने उघडीप दिल्याने भात लागवडी खोळंबल्या 

पुणे ः पुणे जिल्ह्याच्या पश्चिम भागातील मावळ, मुळशी, भोर, वेल्हा या तालुक्यांत गेल्या चार ते पाच दिवसांपासून उघडीप दिली आहे. यामुळे भात लागवडी खोळंबल्या असून वेळेवर भाताच्या पुनर्लागवडी न झाल्यास खरीप हंगाम अडचणीत येण्याची शक्यता आहे. काही ठिकाणी पुनर्लागवडी झाल्या असल्या तरी अनेक भागात पुनर्लागवडी न झाल्यास खरीप हंगाम वाया जाण्याची भीती शेतकऱ्यांमधून व्यक्त करण्यात येत आहे. 

पुणे जिल्ह्याच्या पश्चिमेकडील तालुक्यात गेल्या काही दिवसांपासून जोरदार पाऊस पडत आहे. यामुळे शेतकऱ्यांनी भात लागवडी सुरू केल्या आहेत. जिल्ह्यात आतापर्यंत सात हजार २९२ हेक्टर म्हणजेच १० टक्के क्षेत्रावर भाताच्या पुनर्लागवडी झाल्या आहेत. जिल्ह्यात भाताचे सरासरी ७२ हजार ९५४ हेक्टर क्षेत्र आहे. त्यापैकी सुमारे ६२ हजार ५०० हेक्टरवर लागवडी होण्याचा अंदाज आहे. त्यासाठी वीस ते पंचवीस दिवस अगोदर रोपवाटिका शेतकरी तयार करतात. 

सध्या अनेक ठिकाणी भात रोवाटिकेतील रोपे वाढीच्या अवस्थेत आहेत. मात्र, सुरवातीला टाकलेल्या रोपवाटिकेतील रोपे लागवडीला आली आहे. त्यामुळे अनेक शेतकऱ्यांनी लागवडी केल्या आहेत. त्यासाठी आवश्यक असलेला पाऊस पडत होता. त्यामुळे भात पट्ट्यातील वेळेत भात लागवडी करण्यावर भर देत पुनर्लागवडी करण्यावर भर देत होते. गेल्या वर्षीही याच काळात पुणे जिल्ह्यात चार हजार हेक्टरवर भात रोपवाटिका तयार झाल्या होत्या. यंदा पावसाने उशीर केला असला तरी काही शेतकऱ्यांनी उपलब्ध पाण्यावर रोपवाटिका टाकल्या आहेत. त्यामुळे मोठ्या प्रमाणात भात रोपवाटिकेच्या क्षेत्रात वाढ झाली आहे. अजूनही काही ठिकाणी शेतकरी भात रोपवाटिका टाकत आहे.

तालुकानिहाय भाताच्या पुनर्लागवडी पुढीलप्रमाणे ः चालू आठवड्यात चांगला पाऊस झाल्यास पुढील आठवड्यापासून भातरोपांच्या लागवडीला आणखी वेग येईल. आतापर्यंत हवेलीत ९५० हेक्टर, मुळशी ९४०, भोर १८७५, मावळ ९३०, वेल्हे ७७५, जुन्नर १८०, खेड ७७२, आंबेगाव ६५०, पुरंदर २२० हेक्टरवर भाताच्या पुनर्लागवडी झाल्या आहेत, अशी माहिती कृषी विभागाच्या सूत्रांनी दिली.