उस्मानाबादमध्ये वादळी पावसामुळे फळपिके, भाजीपाल्याचे नुकसान

उस्मानाबाद : जिल्ह्यात पावसाचा मुक्काम वाढला असून सोमवारी (ता.२०) पहाटेही जिल्ह्याच्या अनेक भागात वादळी वाऱ्यासह गारांचा पाऊस झाला. लॉकडाउनमध्ये अडकलेल्या शेतकऱ्यांना आता अवकाळी पावसाचा तडाखा बसतो आहे. 

गत चार दिवसांपासून जिल्ह्यात पावसाची हजेरी लागते आहे. त्यात वादळी वाऱ्याने अनेक ठिकाणच्या पिकांची नासाडी केली आहे. शुक्रवारी (ता. १७) झालेल्या वादळी पावसाने केळी बागांचे मोठे नुकसान झाले. तुगाव (ता. उस्मानाबाद) येथील एका शेतकऱ्यांची तीन एकर केळीची बाग उद्ध्वस्त झाली. तर, त्याच दिवशी पळसप (ता. उस्मानाबाद) येथे पहाटे झालेल्या वादळी वाऱ्याने अनेक कुटंबाच्या घरावरील पत्रे उडाले. 

दरम्यान, गेल्या तीन-चार दिवसांपासून पाऊस जिल्ह्यात कुठे न कुठे हजेरी लावतो आहे. सोमवारी पहाटे जिल्ह्याच्या अनेक भागात पाऊस झाला. तालुक्यातील तेर मंडळात सर्वाधिक ३१ मिलीमीटर पाऊस झाला. बेंबळी मंडळातही ३० मिलमीटर पावसाची नोंद झाली आहे. ढोकी वगळता अन्य महसूल मंडळात बऱ्यापैकी पाऊस झाला आहे. तुळजापूर तालुक्यातील सावरगाव मंडळातही २८ मिलीमीटर पावसाची नोंद झाली.  शिराढोण परिसरात गारपीट 

कळंब तालुक्यातील शिराढोण परिसरात गेल्या दोन दिवसांपासून हजेरी लावत आहे. शनिवारी या परिसरात वादळी वाऱ्यासह सुमारे १६ मिलीमीटर पाऊस झाला. तर सोमवारी (ता. २०) पहाटेही या भागात जोरादार पाऊस झाला. सुमारे ३५ मिलीमीटर पावसाची नोंद झाली आहे. वीजेच्या कडकडाटासह झालेल्या पावसाने शेतकऱ्यांचे मोठे आर्थिक नुकसान झाले आहे. एकीकडे लॉकडाऊनमुळे अनेक ठिकाणच्या फलपिकांची नासाडी होत आहे. नायगाव परिसरात सोमवारी पहाटे चांगलीच गारपीट झाली. यामध्ये काही फळपिकांचे नुकसान झाले आहे.  शहरातही वीजेचा कडकडाट 

उस्मानाबाद शहरातही दुसऱ्या दिवशी वादळी वाऱ्यासह मोठा पाऊस झाला. वीजेचा कडकडाटही जोराचा होता. त्यात वीज गुल झाल्याने नागरिकांची झोपमोड झाली. शहरात सुमारे २० मिलीमीटर पाऊस झाला आहे.