‘स्वाभिमानी’च्या आंदोलनामुळे विम्याचे पैसे शेतकऱ्यांच्या खात्यात

सोलापूर : मंगळवेढा तालुक्‍यातील शेतकऱ्यांचे विम्याचे पैसे देण्यास टाळाटाळ करणाऱ्या ओरिएंटल इन्शुरन्स कंपनीच्या कार्यालयात स्वाभिमानी शेतकरी संघटनेच्या कार्यकर्त्यांनी शुक्रवारी (ता. ८) ठिय्या आंदोलन केले. सायंकाळी दोन तासांहून अधिक काळ झालेल्या आंदोलनानंतर अखेर कंपनीने संबंधित ४५१ शेतकऱ्यांच्या खात्यात पैसे जमा केले.

मंगळवेढा तालुक्‍यातील गत हंगामातील पीकविम्याचे पैसे काही शेतकऱ्यांना मिळाले, तर काहींना हप्ता भरूनही ते मिळाले नाहीत. त्यासाठी कंपनीकडून उडवाउडवीची उत्तरे देण्यात येत होती. पण, ही माहिती मिळताच मंगळवेढ्यातील शेतकऱ्यांसह स्वाभिमानीच्या कार्यकर्त्यांनी ओरिएंटल कंपनीचे कार्यालय गाठून आंदोलन सुरू केले. शेतकऱ्यांना पीकविम्याचे पैसे दिल्याशिवाय आपण मागे हटणार नाही, अशी भूमिका संघटनेच्या नेत्यांनी घेतली. 

या आंदोलनात जिल्हाध्यक्ष महामूद पटेल, जिल्हा संघटक विजय रणदिवे, जिल्हा उपाध्यक्ष पप्पू पाटील, मंगळवेढा तालुकाध्यक्ष श्रीमंत केदार, शंकर संघशेट्टी, महादेव येडगे, संतोष पुजारी, महादेव सोड्डी, वसंत मोची, रावसाहेब संपागणगे, सिद्धाराम संघशेट्टी, हाऊशील पुजारी, सतीश सोनलकर, विजय कोरे, बाबू पटेल, भूषण आकळे, निंगप्पा इगळे, महादेव पुजारी यांच्यासह पीकविमाधारक शेतकरी व संघटनेचे कार्यकर्ते सहभागी झाले. 

सुमारे दोन तासांनंतर अधिकारी नमले, त्यांनी कार्यकर्त्यांशी चर्चा केली. त्यानंतर कंपनीच्या अधिकाऱ्यांनी ४५१ शेतकऱ्यांचे पीकविम्याचे एक कोटी १५ लाख रुपये त्यांच्या खात्यात जमा केले. उर्वरित शेतकऱ्यांना १५ नोव्हेंबरच्या आत विम्यापोटी साडेचार लाख रुपये देण्याचे लेखी आश्‍वासनही कंपनीच्या अधिकाऱ्यांनी दिले.