जळगावात ई-पीक नोंदणी प्रक्रियेत अडचणी

वावडे, जि. जळगाव : राज्य शासनाने शेतातील पीकपेरा नोंदविण्यासाठी ई-पीक पाहणी ॲप विकसित केले आहे. शेतकऱ्यांनी आपल्या अँड्रॉइड मोबाईल फोनवर हे ॲप डाउनलोड करून त्यावर प्रत्यक्ष फोटो अपलोड करून नोंदणी करावी, असे आवाहन करण्यात आले, पण अनेक शेतकऱ्यांकडे अँड्रॉइड मोबाईल नाहीत, यापेक्षा पूर्वीची पद्धत बरी आहे, असा सूर शेतकऱ्यांमध्ये दिसत आहे. 

प्रत्येक गावामधील लागवडीयोग्य क्षेत्रावर कोणती पिके, किती लावलेली आहेत, याची माहिती शासनाला हवी असते. त्यातून राज्यात कोणते पीक किती आहे, याची माहिती मिळते. तसेच नाफेडला शेतीमालाची विक्री करताना किंवा एखाद्या पिकावर नैसर्गिक संकट आल्यास त्याला शासकीय लाभ देताना या पीक नोंदणीचा उपयोग होतो. आतापर्यंत सातबारावर ही नोंदणी तलाठी करत होते. आता हे ॲप आल्याने तलाठ्यांचा ताण कमी झाला; पण पीक नोंदणी करताना शेतकऱ्यांना अनेक अडचणी येत आहेत. 

तालुक्‍यात अनेक शेतकरी अल्प अत्यल्प भूधारक आहेत. यांच्यामधील बहुतेकांना अँड्रॉइड मोबाईल नाहीत, ज्यांच्याकडे व्यवस्था आहे, त्यांना मिश्रपिकांची माहिती कशी भरावी, हे समजत नाही. जमीन क्षेत्रातील कायम पडीक क्षेत्र, शेतातील, बांधावरील झाडांची नोंदणी करतानादेखील अनेक तांत्रिक अडचणी येत आहेत. सर्व माहिती भरल्यावर माहिती व फोटो अपलोड होत नाहीत. अशा एक नव्हे अनेक अडचणी आहेत. 

अँड्रॉइड मोबाईल फोन घ्यायचा कशाने आणि त्याचा रिचार्जचा खर्चदेखील परवडत नाही. प्रचलित पद्धतीने पीक नोंदणी करावी.  - शांताराम पाटील, शेतकरी, वावडे, ता. अमळनेर, जि. जळगाव