औरंगाबाद जिल्ह्यात शेतकऱ्यांना ८५०० क्विंटल हरभऱ्याचे चुकारे अदा

औरंगाबाद :  जिल्ह्यातील ९६३ शेतकऱ्यांकडून १०२४० क्विंटल मक्‍याची हमी दराने खरेदी करण्यात आली आहे. त्यापैकी ८ हजार ९८४ क्विंटल हरभऱ्याचे चुकारे अदा करण्यात आले, अशी माहिती मार्केटिंग फेडरेशनच्या सूत्रांनी दिली.

औरंगाबाद जिल्ह्यात हमी दराने खरेदीसाठी ५ केंद्रे सुरू करण्यात आली होती. या केंद्रांवर २५ मार्च ते ३० जूनपर्यंत नोंदणीची मुदत होती. तर, १५ जुलैपर्यंत खरेदी सुरू होती. या खरेदीच्या मुदतीत पाच केंद्रांवरून ११३० शेतकऱ्यांनी ऑनलाइन नोंदणी केली होती.

नोंदणी केलेल्या सर्व शेतकऱ्यांना प्रत्यक्ष खरेदीचे संदेश पाठविण्यात आले. त्यापैकी ९६३ शेतकऱ्यांकडील १०२४० क्विंटल हरभऱ्याची खरेदी करण्यात आली. त्यामध्ये गंगापूरच्या केंद्रावरून ५३० शेतकऱ्यांकडील ५ हजार ७२३ क्विंटल ५० किलो, औरंगाबाद केंद्रावरून ६१ शेतकऱ्यांकडील ८५७ क्विंटल, खुलताबाद केंद्रावरून ३३९ शेतकऱ्यांकडील ३ हजार ७१ क्विंटल, तर सोयगावच्या केंद्रावरून ३३ शेतकऱ्यांकडील ५८८ क्विंटल खरेदी केलेल्या हरभऱ्याचा समावेश आहे.

गंगापूर केंद्रावरील ४६४ शेतकऱ्यांना त्यांच्या पाच हजार ८२ क्विंटल ५० किलो, औरंगाबाद केंद्रावरील ६१ शेतकऱ्यांच्या ८५७ क्विंटल ५० किलो, खुलताबाद केंद्रावरील २९२ शेतकऱ्यांच्या २६८४ क्विंटल व सोयगाव केंद्रावरील १५ शेतकऱ्यांच्या ३६० क्विंटलचे ८३२ शेतकऱ्यांच्या १९८४ क्विंटल हरभऱ्याच्या चुकऱ्यापोटी ४ कोटी ३७ लाख ९७ हजार रुपये शेतकऱ्यांना देण्यात आले, अशी माहिती मार्केटिंग फेडरेशनच्या सूत्रांनी दिली.