नगर ः नगर जिल्ह्यात कांद्याच्या दरात तेजी कायम आहे. रविवारी (ता. १८) पारनरे बाजार समितीत एक नंबर कांद्याला ८००० रूपये तर आज सोमवारी (ता. १९) नगर बाजार समितीत सरासरी ७००० ते ९१०० रुपये प्रतिक्विंटल पर्यंत शेतकऱ्यांच्या कांद्याला दर मिळाला. कांदा दरात वाढ झाल्याने उत्पादक शेतकऱ्यांत उत्साह आहे.
नगर जिल्ह्यात कांदा उत्पादनाला प्राधान्य दिले जात आहे. मध्यंतरी कांद्याला दर नव्हता. त्यात केंद्र सरकारने कांदा निर्यातबंदी केल्याने शेतकऱ्यांना दराची चिंता लागली होती. मात्र, यंदा पावसाने कांद्याचे नुकसान झाले आहे. शिवाय शेतकऱ्यांकडेही फारसा कांदा उपलब्ध नसल्याने व मागणी चांगली असल्याने कांद्यांच्या दरात वाढ होत आहे. रविवारी पारनेरला लिलावात प्रथम क्रमांकाच्या कांद्याला ९० रुपये, तर इतर कांदा ६५ ते ८० रुपये व त्या खालोखाल ५५ ते ६५ रुपये किलो दर मिळाला. यंदाच्या हंगामातील हा येथील उच्चांकी भाव आहे.
सततच्या पावसाने कांदापिकाचे मोठे नुकसान झाल्याने आता ठराविक शेतकऱ्यांकडेच कांदा शिल्लक आहे. कांद्याला चांगला बाजारभाव मिळत असल्याने, ज्यांच्याकडे कांदा आहे. त्यांच्या चेहऱ्यावर आनंद पसरला आहे.
बाजार समितीत ९७३५ कांदा गोण्यांची आवक झाली. वाघुंडे येथील शिवाजी दिवटे यांच्या प्रथम क्रमांकाच्या कांद्याला ९० रुपये किलो भाव मिळाला. या हंगामातील हा उच्चांकी भाव आहे. तसेच, आता शेतकऱ्यांकडेच माल शिल्लक न राहिल्याने कांद्याचे बाजार आणखी वाढण्याची शक्यता आहे. नगरलाही पन्नास हजारापेक्षा अधिक गोण्याची आवक झाली.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.